Midwife nanghimakak sa pasangil

CEBU, Philippines - Gipanghimakak sa usa ka midwife ang pasangil nga wala niya atimana ang usa ka pasyenteng manganakay niadtong Hunyo 27 didto sa lungsod sa Barili.

Si Jessica Samonte, hingkod, minyo, midwife sa Cabcaban Health Center sa barangay Cabcaban, lungsod sa Barili, mibutyag sa Banat News nga wala niya pasagdi si Leonisa Marata Barcoma, nga miadto sa ilang sentro kay nagbati na niadtong higayona.

Gani iya pa kining gi-I. E., apan nasuta niya nga layo pa kaayo sa puwerta ang bata nga suhi sa pagkabutang sa ilawom sa tiyan.

Maoy hinungdan nga gisugo niya si Roberto, ang bana sa pasyente nga pakuhaon og sakyanan aron ikahatod ang pasyente ngadto sa Barili District Hospital (BDH).

Apan pag-abot nila sa BDH, gimandoan na usab sila sa mga doctor didto nga ipahatod og diretso ang maong pasyente ngadto sa Vicente Sotto Memorial Medical Center (VSMMC) sa dakbayan sa Sugbo.

Busa milahos sila sa VSMMC ug didto giatiman gihapon niya ang pasyente apan walay suwerte kay namatay ang bata didto pa sa tiyan sa inahan.

Giasoy ni Samonte ang tinuod nga hitabo gumikan sa pasangil sa usa ka ginganlan og Wilfredo Patria nga wala kuno niya atimana ang pasyente hinungdan nga namatay ang anak niini.

Matud pa ni Samonte nga wala siya makakita sa dagway sa ginganlan og Wilfredo Patria kay walay laing kauban ang pasyente niadtong higayona gawas sa bana niini.

Si Patria maoy misugilon sa Banat News nga mosumbong kuno ngadto sa Department of Health ang pasyente tungod sa kapakyas ni Samonte sa pag-atiman kaniya.

Apan sa bahin ni Samonte kinsa uban sa iyang bana miduaw gyud sa buhatan sa Banat News kagahapon, siya miingon nga wala siya mabalaka tungod kay wala siya’y nahimong kalapasan sa iyang pagka-midwife. –  BANAT NEWS