P20-milyones utang ang motibo

CEBU, Philippines - Utang nga P20 milyones ang nagtukmod sa pag-umangkon ni Nicolas Ting nga mopatay kaniya hinungdan sa pagbanhig niadtong milabay’ng semana sa barangay Cabangcalan, dakbayan sa Mandaue.

Gikonsiderar nga sulbad na ang kasong pagpamanhig kang Ting human masikop ang iyang pag-umangkon nga si Larry Ting, residente sa sitio Humay-Humay, barangay Basak, dakbayan sa Lapulapu ug tulo ka lalaki nga gituohang iyang sinuholan aron ipatumba ang iyang uyoan.

Kagahapon sa buntag, pormal nga gipresentar sa Task Force Ting si Larry Ting, ang gikontrata niyang si Edwin Juab, 28, founder sa Trese Hudas Gang nga taga Ermita, silingan ni Juab nga sakop sa Alpha Kappa Rho nga si Jordan Miral, 30, ug ang triggerman nga 16-anyos nga taga Basak, Lapulapu.

Si Sr. Supt. Melvin Buenafe, hepe sa Regional Intelligence Division sa PRO-7 ug nangulo ug tigpamaba sa Task Force Ting miingon nga tungod sa paninguha sa tanang naglangkob sa task force nadakpan si Larry, Juab, Jordan ug ang bata.

Si Buenafe nagkanayon nga ang wala mabayring P20 milyones o sobra pa nga utang ni Larry ngadto sa uyoang si Nicolas maoy nagtukmod sa pag-umangkon nga ipapatay kini. Si Larry anak ni Elmo nga igsuon nilang Nicolas ug Manuel. Si Manuel gibanhigan usab patay sa barangay Tisa usa ka gabii human gibanhigan si Nicolas.

Matud ni Buenafe nga wala gyud mabayri hangtod karon ang utang ug nagpunay na og paningil si Nicolas nga posibleng gikasuko ni Larry.

Si Juab maoy yawe sa kalampusan sa pagsulbad sa kaso. Si Juab misaysay sa tanan niyang nahibaw-an sa krimen human siya unang gipik-ap sa mga sakop sa Theft and Robbery Section sa siyudad sa Sugbo niadtong Hunyo 28 sa gabii samtang nagdula og mahjong sa Humay-Humay.

Sumala pa nga si Juab ang nagsilbeng “middle man” tali sa mastermind ug sa gunman ug sa mi-drive sa motorsiklo.

Si Sr. Supt. Patrocinio Comendador, hepe sa Cebu City Police Office (CCPO) ug sakop sa Task Force Ting nagkanayon nga milutaw ang ngalan ni Juab atol sa ilang inisyal nga imbestigasyon.

Giangkon gilayon ni Juab ang iyang partisipasyon sa krimen ug mitug-an nga gi-hire siya ni Larry aron ipapatay ang uyoan niining si Nicolas bugti sa P200 mil nga ipaagi og installment sugod niadtong Disyembre 2009.

Ang inpormasyon ni Juab miresulta sa pagkasikop sa 16-anyos ug silingan niyang si Miral.

Ang 16-anyos nga gunman nakuhaan og .45 kalibre sa pistola nga may pito ka buhing bala, ug nasayrang nalambigit kini sa tulo ka pagpamusil sa Lapulapu.

Atol sa pagkasikop sa 16-anyos, nasikop usab ang ig-agaw niining si Janstil Flores nga nakuhaan og .45 kalibre nga pistola, dunay unom ka buhing bala, ug .357 rebolber ug upat ka buhing bala sa tambor niini. Apan giklaro sa kapolisan nga walay labot si Flores sa pagbanhig kang Nicolas.

Si Juab sa dihang gipangutana sa mga sakop sa media mitug-an nga niadtong Disyembre 3 sa miaging tuig, dihay miduol kaniya nga naila lang sa ngalan nga “James” ug mihatag kaniya og cellphone ug sim-pack ug nangutanang andam ba siyang modog (pasabot niini mopatay og tawo).

Matud ni Juab nga pagkataudtaod adunay mitawag kaniya sa cellphone nga tingog sa usa ka lalaki ug nagpalo-ap kun andam ba siyang mopatay bugti sa salapi.

Dugang pa ni Juab nga ang tawo misulti kaniya nga ang patyonon mao si Nicolas Ting ug didto na nagsugod ang iyang pagpaniid sa kalihukan sa biktima. Niadtong Marso didto siya sa Dumaguete sanglit gipahibalo siya sa nagsugo kaniya nga molarga si Nicolas paingon sa Dumaguete.

Didto siya mo-check in sa Negros Lodge diin ang tawo didto usab sa Dumaguete human iyang nakit-an sulod sa Negros Lodge nga iya na lang nailhan sa kaulahian nga mao si Larry Ting kinsa mipahibalo kaniya nga dunay gibilin nga pusil sa pikas kuwarto sa Negros Lodge.

Matud ni Juab nga gimanduan pa siya ni Larry nga anaa mag-check in sa Palwa Hotel ang patyonon nga si Nicolas Ting.

Apan wala gyud niya makit-i si Nicolas busa nakahukom siyang mobalik sa Sugbo ug iyang gibilin ang armas sa katubhan sa Dumaguete.

Matud ni Juab nga niadtong Abril, padayon siyang nagsunod-sunod kang Nicolas dinhi sa Sugbo ug padayon usab siyang nangayo og kuwarta kang Larry ug dihay higayon nga iya na untang gibirahan ang biktima samtang nagpatubil og gasolina sa uptown area, apan mikagar ang pusil.

Nakahukom na siyang iya nga ipatrabaho og lain ug iyang nahunahunaan ang 16-anyos nga maoy pabirahon sanglit naatol usab kini nga nagkita sila ug nangutana kini kun wala ba silay posibling kakuwartahonon.

Si Juab nakugang nga duha ka Ting ang gibanhigan ug nagtuo siya nga usa ra ang mibanhig sa magsuon sanglit matud pa niya dili na makontak ang 16-anyos ug si Miral.

Ang 16-anyos nga gunman miangkon nga siya maoy mipusil kang Nicolas apan wala siya makadawat og bayad.

Sa wala pa nila banhigi si Nicolas, ang batan-on gipainom una og tulo ka botelyang beer ni Juab ug sa dihang positibo na ang ilang target sa Cabancalan misakay siya sa gimanehong motorsiklo ni Miral.

Apan si Comendador nagkanayon nga human gibanhigan si Nicolas, si Juab didto sa crime scene apan wala magdugay misibat sa kahadlok nga siya mahibaw-an ug dakpon sa kapolisan.

Si Miral nga gikuhaan unta sa iyang habig nagdumili paghatag og kasayuran sa maong krimen sanglit gipugngan siya sa iyang abogado.

Ang Task Force Ting nag-andam na sa tukmang kaso nga ipasaka batok ni Larry ug sa tulo ka suspek. Lakip sa ipasaka ang illegal possession of firearms.  –  BANAT NEWS