Armas sa polis gikiriw
CEBU, Philippines - Usa ka polis nawad-an sa iyang armas dihang gikiriw kini sa wala hiilhing kawatan didto sa ilawom sa Marcelo Fernan Bridge sa barangay Pusok, dakbayan sa Lapulapu sa miaging adlaw.
Ang biktima mao si PO1 Eric Espinosa, 30, minyo, nga taga sitio Locatha, barangay Looc, dakbayan sa Lapulapu.
Si Espinosa nagtibi nga misumbong sa kapolisan sa Lapulapu bahin sa pagkawagtang sa iyang armas nga 9mm pistol.
Gawas sa maong armas nawagtang usab ang iyang cell phone, ID sa PNP, ug rehistro sa iyang motorsiklo sulod sa compartment sa iyang motorsiklo.
Gitug-an ni Espinosa nga gibilin niya sa makadiyot ang iyang motorsiklo sa ilawom sa Marcelo Fernan Bridge kay may gibisitahan siyang higala sa maong lugar.
Apan sa iyang pagbalik, giguba na ang compartment sa iyang motor nga gisudlan sa mga butang nga nawagtang.
Sa pagkakaron gipangita pa sa kapolisan sa Lapulapu ang kawatan. – BANAT NEWS
- Latest
- Trending
