Sanchez mipabasura sa protesta ni Soco

CEBU, Philippines - Pormal nang miduso sa iyang tubag ngadto sa Commission on Elections (COMELEC) Manila si Bise Gob. Gregorio Sanchez Jr., kagahapong adlawa aron ipabasura ang election protest sa naparot niyang kaatbang nga si Glenn Soco ang running mate ni incumbent reelected Gob. Gwendolyn Garcia.

Si Sanchez pinaagi sa iyang legal counsel nga si kanhi prosecutor Oliveros Kintanar miduso sa walo ka pahinang tubag nga nag-awhag sa Comelec pagbasura sa maong election protest.

Sumala pa sa tubag, walay basehanan ang pasangil ni Soco nga dunay nahitabong pagpanikas sa milabay’ng eleksyon tungod kay daan na kining midawat sa iyang kapildihan pagkahuman sa ihap sa mga balota.

Gibasehan usab ni Sanchez ang pasiunang pamahayag ni Soco subay sa iyang giduso nga protesta nga nagduha-duha siya pagduso sa maong protesta.

Giawhag hinuon ni Kintanar si Soco nga dawaton nalang ang tinuoray’ng resulta sa milabay’ng eleksyon ug moatras sa giduso nga protesta.

Nunot niini, midemanda og danyos si Sanchez nga P540 mil alang sa attorneys fees ug uban pang danyos nga subay sa hustong proseso ug ingon man ang pagpabasura sa maong election protest.  – BANAT NEWS