CEBU, Philippines - Hingpit nga miasumer sa iyang ikaduhang termino si Mayor Jonas Cortes human siya manumpa kagahapon sa pagdawat sa maong katungdanan atubangan ni Executive Judge Marilyn Yap kinsa maoy midumala sa maong pagpanumpa nga gisaksihan sa kaliboan ka mga katawhan sa dakbayan sa Mandaue.
Kauban niyang nanumpa mao usab ang iyang bise mayor nga si Glenn Bercede alang sa unang termino niini.
Samtang gibuwag usab pagpapanumpa ni Judge Yap ang mga sakop sa konseho nga sakop sa Team Honesty nga naglakip kanila ni Konsehal Diosdado Suico, Bethoveen Andaya, Jefferson Ceniza, Jimmy Lumapas, Nenita Layese, Benjamin Basiga, Elstion Dabon ug Demetrio Cortes Jr.
Si Cortes nga nahinabi sa Banat News miingon nga iyang gipasalamatan ang mga Mandauehanon nga padayong misalig kaniya sa pagdumala sa rinda sa panggobyerno sa dakbayan sa Mandaue.
Busa gisaad usab niya nga dili niya kawangon ang maong pagsalig ug andam niyang suklian kini sa iyang matinud-anon ug sinsero nga serbisyo.
Kini pinaagi sa pagpatuman sa mga programa nga makahatag og kaayohan sa kinatibuk-ang molupyo sa dakbayan.
Matud pa ni Cortes nga nag-una sa iyang programa nga ipatuman mao ang pag-atiman sa panglawas sa mga kabus nga molupyo sa dakbayan, socialized housing, solid waste management program, pagpalambo sa kadalanan ug mga kanal sa dakbayan ug uban pa.
Samtang si Bise Mayor Bercede sa iyang bahin mibutyag usab sa Banat News nga ang iyang himoon sa konseho mao ang pagsuporta aron makabaton og katumanan ang mga programa sa mayor sa dakbayan. - Romeo T. Limpangog ug Bong Soriano (BANAT NEWS)