'Mastermind,' laing 3 sikop

CEBU, Philippines - Gidudahang ‘mastermind’ ug tulo ka mga gikunsiderar nga gunmen sa pagpusil kang Nicolas Ting ang naa karon sa kustodiya sa Task Force Ting ug gisusi na ang kalambigitan sa upat sa kamatayon ni Manuel Ting.

Apan ang kapolisan nagdumili pa paghatag og mga detalye kabahin sa maong mga suspek sanglit nagpadayon pa ang follow-up operation mahitungod niini.

Sigun sa report, ang tulo ka mga giingong gunmen gi –pickup dinhi sa Metro Cebu samtang ang giingong ‘mastermind’ didto sa ubang dapit madakpi ug kagabii lang gidala sa Cebu City Police Office.

Si PRO-7 Chief Supt. Lani-O Nerez miapelar sa mga sakop sa media kagahapon nga dili una ibalita ang kabahin sa mga detalyeng makaapekto sa operasyon labot sa duha ka linuog nga krimen sa managsuong Ting.

Una nang namahayag ang TF Ting nga posibleng konektado ang duha ka pagpamanhig nga mikalas sa usa sa magsuon ug negosyo ang ilang gidudahan nga motibo.

Si Manuel Ting gilubong na kagahapon diha sa Angelicum sa barangay Pagsabungan sa dakbayan sa Mandaue apan ang mga kabanay niini wala motugot og interbyu sa mga sakop sa media human sa lubong.

“Ang amo lang ikasulti nga dunay development sa kaso…there are significant development on the case and the details will be announce later,” matud pang Cebu City Police Office director Patrocinio Comendador sayo kagahapon sa buntag

Kagahapon sa udto, usa ka sakop sa task force ang naangol atol sa hot pursuit operation nga sakop sa Theft and Robbery Section (TRS) sa Cebu City Police Office (CCPO) human mabangga ang patrol car diha sa downtown area nga si SPO1 Raul Cosido nga nagmaneho sa patrol car sa TRS nga apil sa operasyon batok sa usa sa mga suspek nga nadakpan.

Ang inahan sa ikatulong gi-pick up nga suspek nga gikatahong sakop sa Alpha Kappa Rho Fraternity nahibulong nganong gilambigit ang iyang anak sa maong krimen.

Ang commander sa task force nga si Sr. Supt.Ramon Melvin Buenafe mikompirmar nga aduna silay nasikop apan aduna pa silay padayong gipangita nga gawasnon pa. Giingong pulos sila mga sakop sa usa ka gun for hire nga grupo.

Sumala pang Buenafe, human sa pagkasikop sa tulo nakakuha na sila dayon og lead sa kung si kinsa ang posibleng ‘mastermind’ pagpapusil sa managsuon.

Midugang usab si Buenafe nga nadungagan usab ang mga testigos nga ilang nakuha sa duha ka krimen. Nakuhaan usab ang mga suspek og duha ka kalibre sa .45 ug usa ka kalibre .38 rebolber. Ang mga kabanay ug kahigalaan sa mga Ting nanawagan og hustisya sa kamatayon ni Emmanuel Ting ug sa pagkaangol kang Nicolas Ting.

Hugot nga seguridad ang gipatuman gikan palang sa Saint Peter Funeral Homes sa barangay Day-as. Ang funeral convoy miagi pa sa gipanag-iyang hotel ni Ting nga gilangkuban og kapin sa 100 ka sakyanan. – BANAT NEWS