CEBU, Philippines - Namatay dihadiha ang nagbantay sa boarding house sa usa ka konsehal sa dakbayan sa Mandaue human kini magpusil sa iyang kaugalingon didto sa Barangay Mantuyong , dakbayan sa Mandaue kagahapon sa alas 7:00 pasado sa buntag.
Ang naghikog pinaagi sa pagpusil sa iyang ulo mao si Jerwin Decinan, 27, ulitawo nga may kapuyong dalaga , lumad nga taga lungsod sa Argao ug piyado sa apartment ni konsehal Jimmy Lumapas sa Mandaue.
Sumala kang PO3 Dante Wenceslao sa Mandaue City Police Office nga si Joel Monghit, kauban sa trabaho ni Decina maoy mipahibawo kanila ug mibutyag bahin sa nahitabo kang Decina.
Matud pa ni Monghit nga una niyang nabati ang usa ka buto sa armas de fuego gikan sa lawak ni Decina ug sa pagsusi niya niini maoy iyang nakita nga nagkirigkirig ang mga tiil ni Decina, naglunang sa dugo ug gitabunan ang iyang nawong sa panyo, samtang ang .38 kalibre nga revolver diha sa iyang tupad.
Gituohan sa kapolisan nga ang armas nga diha sa kiliran ni Decina maoy gigamit sa paghikog niini.
Sa imbistigasyong gihimo sa kapolisan nasayran usab nila nga dugay nang nag-antos sa sakit nga “hernia” si Decina unya wala kini makapa-opera kay usa ra ka libo ka pesos ang nahuwaman niini gikan sa suod niyang higala.
Gituohan sa kapolisan nga mao kini hinungdan sa paghikog sa piyado ni konsehal Lumapas. – BANAT NEWS