CEBU, Philippines - Mibahad si kanhi Dangerous Drugs Board (DDB) undersecretary nga mangunay pagpasaka og kaso batok niadtong mga lokal nga kagamhanan nga mapakyas o magdumili pag-abag sa kapulisan sa kampanya batok sa gidiling drugas.
Si Oaminal mipalanog niini dihang nagsilbing lecturer sa subject nga drug trafficking ngadto sa mga police investigators dinhi sa Sugbo niadtong Biyernes diha sa Police Regional Office (PRO-7).
Gibasehan ni Oaminal ang probisyon sa Sec.51 sa Akta Republika 9165 kon Comprehensive Dangerous Drugs Board nga nag-obligar sa mga lokal nga kagamhanan paggahin og pundo alang sa kampanya batok sa gidiling drugas.
Kini sama sa pagpahigayon og mga educational programs ingon man rehabilitation o treatment sa mga drug dependents.
Matud ni Oaminal mahimong makasuhan og kriminal ingon man administratiba ang mga opisyal sa lokal nga kagamhanan nga mapakyas pagtuman niini.
Dugang ni Oaminal nga himuon niya kini isip tipik og kabahin sa iyang anti drug advocacy.
Si Oaminal gipalagpot ni outgoing president Gloria Arroyo pagka DDB undersecretary niadtong petsa 19 sa Marso sa walay igong hinungdan apan karung bag-o gihugon-hugonang itudlo og balik human unya sa pag-asumir ni president elect Benigno “Noynoy” Aquino isip undersecretary sa Department of Interior and Local Government (DILG).
Si Oaminal nakakita og tsansa pinaagi sa DILG nga mahimong aktibo ang Barangay Anti Drugs Abuse Council (BADAC) aron palig-onon pa ang kampanya batok sa ginadiling drugas diha sa kabarangayan. – BANAT NEWS