Pasahero gihimulbolan sa tulisan

CEBU, Philippines - Duha ka pasahero ang gihimulbolan sa mga alahas ug mga personal nga gamit human kini tulisa sa wala hiilhing armadong mga tawo sulod sa jeep nga ilang gisakyan didto sa barangay Guizo, dakbayan sa Mandaue sa miaging adlaw.

Ang mga biktima mao sila si Marisa Lingamen, 52, taga sitio Coconut 2, barangay Umapad, dakbayan sa Mandaue, ug Wilma Pumanoc, 41, taga sitio Mohon 2, barangay Tisa, dakbayan sa Sugbo.

Ang mga biktima misumbong sa kapolisan nga misakay sila og jeep pasaheroan paingon sa Mabolo, dakbayan sa Sugbo gikan sa merkado sa dakbayan sa Mandaue kauban ang duha ka pasaherong lalaki.

Apan sa ilang pag-abot sa barangay Guizo, pipila ka metros gikan sa merkado, kalit lang m ilanit sa ilang armas de fuego ang duha ka pasahero ug mipahibawong tulis.

Ang mga biktima kinsa nabalaka sa ilang kinabuhi wala na moreklamo dihang gipangayo ang ilang mga alahas sama sa ariyos , relo , singsing, cell phone ug uban pa.

Human makuha ang tanang mga butang sa ilang bag, misirit dayon og panagan ang mga tulisan ug ang drayber wala lang usab moreklamo sa kabalaka nga pusilon siya niini.

Ang mga biktima walay nahimo gawas sa pagtibi atubangan sa kapolisan, samtang padayon karong gipanid-an sa mga otoridad ang maong mga tulisan. (BANATNEWS)