Pasil fish market ibalhin

CEBU, Philippines - Nagplano si Mayor-elect Michael Rama nga sundon ang sugyot nga hawanan ang Pasil Fish Market ug himuon kining public plaza, samtang ang maong merkado adto na ibalhin sa Pasil Fish Port.

Ang sugyot nagagikan sa kapitan sa barangay Suba nga si Joel “Jojo” Sable aron malimpyo ang maong dapit ug aron usab mapahimuslan og maayo ang edipisyo sa Pasil Fish Market. Hinuon gipahibalo ni Rama nga walay angayang ikabalaka ang maapektahang fish vendors gumikan kay ibalhin lamang sila og pwesto.“Ato lang klarohon nga dili angay mabalaka ang mga fish vendors kay ato man sad sila ipahimutang sa higayon nga ma-develop na og maayo ang fish port,” nagkanayon si Rama.

Ang maong public plaza butangan usab og playground sa mga bata kung hingpit nga mapatuman kay buot ni Rama nga mahatagan og importansya nga matiman-an sa kabataan ang mga maayong proyekto sa gobiyerno alang kanila.

Matud pa ni Rama nga usa sa makabintaha sa maong plano mao unya ang manimba sa San Nicolas de Tolentino Parish Church gumikan kay naglaraw siyang maablihan ang atubangang ganghaan sa maong simbahan. “Gusto nako nga maablihan ang atubangan nga gate, kay kung atong huna-hunaon, dunay sentimental value ang maong simbahan kay 500 years naman gud na,” dugang pa ni Rama. (BANATNEWS)