CEBU, Philippines - Nadakpan sa kapolisan ang usa ka tawo nga gituohang pusher og shabu didto sa dalan G.M. Ceniza sa barangay Looc, dakbayan sa Mandaue sa miaging kaadlawon.
Ang suspetsado mao si Edgar Malingin, 50, minyo nga nagtrabaho isip drayber sa sakyanan nga pribado ug nagpuyo sa nahisgotang dapit.
Ang team sa City Anti Illegal Drug Special Operation Task Force (CAIDS0TF) nga gipangulohan ni SPO4 Jose Dilao ug mga sakop, nga sila si PO3 Martiniano Tagalog,ug PO2 Jefferson Jacalan maoy nakadakop kang Malingin sa nahisgotang lugar.
Kini human nila madawat ang tawag sa telepono gikan sa usa ka tawong nagpakabana nga nagpahibalo kalabot sa illegal nga kalihokan sa maong dinakpan.
Matud pa ni SPO4 Dilao nga sa pag-abot nila sa maong lugar, nakamatikod dayon ang suspetsado hinungdan nga buot unta kining mosibat ug maayo nalang kay ila kining napugngan ug sa pagrikisa nila sa iyang bulsa didto ra ang duha ka pakete sa shabu nga wala matino ang gibug-aton niini.
Ang kasong kalapasan sa Article II, Section 2 sa Republic Act 9165 kon Comprehensive Dangerous Drugs Act of 2002 maoy ilang ipasaka batok sa maong dinakpan kinsa gibalhog na karon sa bilanggoan. - BANAT NEWS