Sonny O supak sa mando ni Arroyo

CEBU, Philippines - Kusganong gisupak ni kanhi senador Sonny Osmeña ang labing ulahing kamanduan ni Presidente Gloria Macapagal Arroyo nga nag-promote sa tanang mga abogado sa gobiyerno ngadto sa pagka- Career Service Officer V.

 Kini tungod kay matud pa ni Osmeña nga mao kini ang usa sa mga butang nga makapakupos pag-ayo sa pundo sa kagamhanan.

Sa interview sa DyRF si Osmeña nagkanayon nga ang kamanduan nga gipagawas ni Arroyo dili makatarunganon ug may nagpahiping political ug personal nga interest.

 Kini tungod kay ang promotion sa usa ka career service officer magkinahanglan og makuting proseso una siya makaabot sa posisyon sa pagka-director, matud pa ni Osmeña.

Iyang gipasabot nga makapurdoy sa panudlanan sa gobiyerno kun ipatuman ang 11th hour nga kamanduan ni Arroyo sanglit ubay-ubay na karon ang mga abogado sa gobiyerno .

Giawhag hinuon ni Osmeña si President-elect Benign “Noynoy” Aquino III nga mohimo dayon og dinaliang aksyon kalabot niini sa higayon nga makalingkod na siya sa Malacañang.

Gitumbok sa kanhi senador nga mapuno unya sa utang ang pamunuan ni Aquino bunga sa sobrang pagwaldas sa pundo sa administrasyon ni President Gloria Macapagal Arroyo.

Siya nagtuo nga tungod sa kadako na sa utang sa nasud hayan maglisod og lihok si Aquino sa gusto niining mga proyekto alang sa kaayohan sa nasud. -  BANAT NEWS