Cuenco wa pay tanyag ni P.Noy

CEBU, Philippines - Gitug-an ni outgoing Cebu City South District Kong. Antonio Cuenco nga wala pa siya makadawat og offer gikan sa kampo ni president-elect Sen. Benigno ‘Noynoy’ Aquino III aron makakupot og posisyon sa kabinete niini.

Matud pa ni Cuenco nga nagpabilin ang ilang maayong komunikasyon sa pamilyang Aquino tungod kay suod kaayo siya sa maong pamilya sukad pa kaniadtong presidente pa si kanhi presidente Corazon Aquino, ang inahan ni Noynoy.

Apan giklaro ni Cuenco nga wala siya magpaabot nga mahatagan og posisyon sa Malacañang kun magsugod na sa paglingkod si Aquino sa pagkapresidente sa nasud sugod karong Hulyo 1.

Kini tungod kay wala gyud siya’y gi-aplayang departamento nga iyang giinteresan nga mahuptan ilawom sa pamunuan ni Aquino.

Hinuon mipadayag si Cuenco nga magpaabot lamang siya kun tawagon siya ni Aquino aron kuhaon ang iyang serbisyo ug kun siya kinahanglanon.

Sa pangutana kun unsa iyang buhaton kun duna unya’y itanyag kaniyang posisyon ang bag-ong presidente, si Cuenco nagkanayon nga iya unang tan-awon ang posisyon kun haom pa ba siya ug nalinya ba sa ilang kapasidad.

Iyang giklaro nga makatabang kaayo siya sa napiling presidente sa mga trabaho sa foreign affairs o ba kaha sa departamento sa edukasyon.

Matud pa niini nga kun siya mahipunta sa Department of Education iyang tinguhaon nga mapalambo pa pag-ayo ang English proficiency sa mga katabataan. -  BANAT NEWS