CEBU, Philippines - Kabanay sa usa ka babaye nga namatyan og bata sa iyang sabakan tungod kay gibiyaan sa midwife sa lungsod sa Barili nagplano nga modangop sa Department of Health.
Ang pasyente nga si Leonisa Marata Barcoma nagbati niadtong Hunyo 17. Ang iyang kabanay midala kaniya sa Barangay Cabcaban Health Center, lungsod sa Barili.
Si Wilfredo Patria, bayaw ni Leonisa, miasoy sa dihang nahinabi sa Banat News nga sa dihang naabot sila sa health center, wala dayon dawata sa midwife ang pasyente. Gimandoan hinuon ang bana ni Leonisa nga si Roberto nga papaulion ug pakuhaon og bugas, kahoy, kaldero, banig, habol ug kwarta.
Sumala pa ni Patria, nasayod na sila sa patakaran sa maong health center apan gumikan kay dinalian man wala kini madala ni Roberto.
Dugang pa ni Patria, samtang nagpaabot sa sentro gihiling sa midwife ang nag-inusarang si Leonisa ug sa dihang nasayran nga “suhi” ang bata ug migawas og una ang mga kamot, mimando kini nga dad-on siya sa Barili District Hospital.
Gidali pagdala sa Barili District Hospital si Leonisa kuyog ang midwife ug ang nalangay niyang bana, apan pag-abot sa maong tambalanan girekomendar gihapon kining ipadala sa Vicente Sotto Memorial Medical Center.
Apan samtang nagpaingon sa VSMMC luwan sa ambulansiya, si Patria miingon nga pag-agi nila sa barangay Mantalongon, Barili si Samonte mikanaog kay mouli na kini.
Si Leonisa, sa dihang nahinabi sa Banat News, nagkanayon nga dugay usab siyang natagad sa VSMMC tungod sa kadaghan sa mga pasyente.
Si Patria mibutyag nga nasulod gyud sa delivery room si Leonisa apan nasubo sila sa dihang gipahibalong patay na ang bata paggawas gikan sa sabakan sa inahan.
Gibasol sa banay’ng Barcoma ang midwife sa nahidangatan sa bata. Nagplano ang pamilya nga modangop sa Department of Health aron ireklamo ang midwife.
Sa pakighinabi sa Banat News, si Patria miila sa midwife nga mao si Jessica Samonte. Ang Banat News naninguha apan pakyas pagkuha sa habig ni Samonte. - BANAT NEWS