Ex-fiscal napalgang patay sa kuwarto

CEBU, Philippines - Patay na nga napalgan kagahapon sa buntag sulod sa iyang kwarto sa iyang balay sa Phase 3D Camella Homes, barangay Lawaan I, dakbayan sa Talisay si retired Regional State Prosecutor Hernando Masangkay.

Si Masangkay adunay samad dinunggaban sa iyang ubol-ubol naabtan na kini sa iyang pag-umangkon nga si Carl Stephen Montenegro, hingkod ang panuigon, taga barangay Tanke, Talisay ug sa iyang kumpare nga si Jeffrey Joven nga silingan sa biktima nga nagbuy-od ibabaw sa iyang kama nga naglunang sa iyang kaugalingong dugo.

Sila si PO3 Mikie Espina ug PO2 Stephen Sefuesca sa Homicide Section sa Talisay City Police Station sa pakighinabi niini sa Banat News kagahapon nagkanayon nga si Masangkay nag-inusara kining nagpuyo sa iyang balay sanglit biyudo na kini ug ang iyang duha ka anak atua sa laing nasud ug ang usa atua nanimuyo sa dakbayan sa Ormoc, Leyte.

Ang anak ni Masangkay nga si Regie nga nagpuyo sa Ormoc nanawag sa iyang mga paryente tungod kay gibati kini og kabalaka diin sulod na sa duha ka adlaw ang iyang amahan wala na motubag sa iyang tawag sa telepono.

Si Montenegro gipamalihog ni Regie nga susihon ang iyang amahan sa balay. Mga alas 11:30 sa buntag kagahapon, si Montenegro mitawag sa TCPS ug mitaho sa nahisgutang insidente.

Matud sa mga polis nga ang gate ug ang main door sa balay abli na kini pag-abot ni Montenegro hinungdan nga milili una si Montenegro ug gitawag si Joven aron iyang pakuyogon sa pagsusi sa iyang uyoan.

Naabtan sa duha nga nag-andar pa ang aircondition sa kwarto sa biktima samtang nagbuy-od na kining wala nay kinabuhi. Si Espina mibutyag nga si Masangkay dunay personal driver nga nailhan lang nila sa ngalan nga “Daryl” apan stay-out kini ug tawagon lang sa biktima kun duna kini lakaw ug iyahang pamanehuon sa iyang sakyanan.

Matud usab sa maong polis nga dili kawat o tulis ang motibo sa pagpatay tungod kay ang kwarta sa biktima nga nagkantidad og P3,750, duna pay mga dolyares sulod sa iyang pitaka, Nokia 1100 cellphone mga alahas, pass- port, ID ug mga gamit sa balay walay nangawagtang.

Hapsay ang sulod sa balay wala mangakatag-katag ang mga gamit.

Ang paryenteng doktor ni Masangkay nga si Panamino Jose Marie Montenegro mibana-bana nga sobra sa 24 ka oras na nga namatay ang biktima. Si Espina midugang nga natahap sila nga ang mamumuno suhito kini sulod sa balay ug ilang gituohan nga natulog ang biktima sa dihang gidunggab tungod kay wala silay nakitang mga timailhan nga nakasukol pa si Masangkay ngadto sa kriminal.

Ang kapolisan mipahigayon og follow-up nga imbestigasyon sa hitabo aron ilahang mailhan ang kriminal ug ang motibo niini.   - BANAT NEWS