SUV ni Joavan giuli sa kapolisan

CEBU, Philippines - Giuli na sa kapolisan niadtong Biyernes ang sakyanan sa kontrobersiyal nga sinagop sa mayor sa dakbayan sa Talisay nga si Joavan Fernandez subay sa kamandoan sa korte.

Si Regional Trial Court (RTC) Judge Douglas Marigomen sa Branch 5 miluwat og release order aron makuha ni Joavan ang iyang sakyanan sa nahisgutang adlaw.

Si Clemente Fernandez Jr. uyoan ni Joavan maoy mikuha sa Isuzu Big Horn nga kolor puwa nga nagtangag sa plakang YEZ-460 nga gisakyan ni Joavan dihang mahitabo ang pasangil nga nanion kini og pusil ngadto sa usa ka registered nurse nga si Vincent Castrodes.

Nakuha sa gihimong pagsiksik sa sakyanan ang usa ka kalibre .45 nga pistola, 13 ka mga buhing bala, duha ka magazine, usa ka magazine pouch nga kolor itom ug usa ka holster sa kalibre .45 nga kolor itom usab.

Apan gihimakak ni Joavan ug sa amahan niining si Mayor Socrates Fernandez ngadto sa usa ka programa sa usa ka estasyonan sa radyo nga ilaha ang maong armas.

Ang Cebu Provincial Police Office mipasaka og obstruction of justice ngadto sa Ombudsman Visayas batok kang Mayor Fernandez tungod sa pagpugos niini og abli sa sakyanan ug mikuha sa usa ka bag nianang hapon bisan gikostudiya na sa kapolisan ang maong sakyanan.   (BANATNEWS)