Job related ang ambush-try

CEBU, Philippines - Gitutukan sa kapolisan ang anggulong may kalambigitan sa trabaho ang motibo sa pagsuway og ambush sa marketing manager sa Taiheiyo Cement nga si Nestor Zamoras niadtong Biyernes sa udto sa Ayala Access Road sa barangay Camputhaw.

Ang Deputy City Director for Operations Supt. Pablo Labra II mibutyag sa Banat News nga usa kini sa ilang gisubay nga motibo base sa ilang nakuhang mga ebidensya ug mga impormasyon.

Samtang susihon usab sa kapolisan ang nanggawas nga report nga dunay laing mastermind sa maong napakyas nga ambush ug dili lamang si Jerome Noel nga maoy gitumbok sa drayber nga si Roberto Tercero ug gunman nga si Orlando Sagnoy.

Wala matiwas kagahapon ang pagpasaka sa kaso batok sa tulo gumikan sa kakulang sa mga dokumento nga naglakip sa mga pinanumpaang affidavit sa mga testigo ug uban pa.

Kasong attempted murder, illegal possession of firearms, illegal nga paghupot ug ginadiling drugas ang ipasaka batok sa tulo.

Samtang ang deputy chief sa City Investigation and Detective Management Branch (CIDMB) nga si Insp. Genilo Veraque mibutyag nga hugtanong gihimakak ni Noel ang tanang pasangil nila ni Sagnoy ug Tercero.

Kahinumduman nga niadtong Biyernes sa udto pasado alas-12 kalit nga gibanhigan si Zamoras samtang luwan sa iyang Ford Everest nga SUV, apan swerteng bullet proof ang sakyanan niini ug wala makalapos ang mga bala.   (BANATNEWS)