ABC president gitaktak sa posisyon

CEBU, Philippines - Gitangtang sa iyang katungdanan sa pagka-ABC president sa usa ka lungsod sa habagatang bahin sa Sugbu human gireklamo sa kaubanang mga kapitan tungod sa pagkahurot sa ilang pundo nga walay klaro asa napadulong.

Gitangtang sa katungdanan ang maong kapitan(pangalan gipugngan sa Banat News hangtud di kakuhaan sa iyang habig) subay sa kamandoan ni Provincial ABC Federation President, outgoing provincial board member ug Boljoon mayor-elect Teresita Daday Celis ug mga kaubanan sa board members niadtong Hunyo 8 ning tuiga.

Usa sa hinungdan sa pagkatangtang sa kapitan mao ang kapakyas niini pagtambong sa mga imbestigasyon labot sa isyu sa paggamit sa mga pundo sa ABC sa Barili ug ang kapakyas niini pag-liquidate sa pundo sa liga sa barangay sa naasoy’ng lungsod.

Si Celis ug mga kaubanan mipagawas og kamanduan nga nagtudlo sa bise presidente sa gitangtang nga kapitan nga si kapitan Norman Anori isip hulip sa pwesto niini sa konseho sa ilang lungsod.

Si Anori mitug-an sa Banat News nga kagahapon sa buntag pa lamang niya hingpit nga nadawat ang kamandoan ni Celis nga siya na ang ABC president sa ilang lungsod.

Matud pa ni Anori nga niadtong miaging tuig gipapirma sila sa gitangtang nga opisyal og papeles aron mokuha og P50 mil sa ilang pundo pagtabang sa ilang kaubang kapitan nga nanginahanglan kaayo sa nahisgutang pundo.

Apan ilang nasayran nga makatulo diay gigamit ang maong papeles hinungdan nga P150 mil ang nakuha sa pundo sa liga sa barangay.

Gitug-an usab niini nga ang ilang buhatan nakadawat og P200 mil nga hinabang financial gikan ni 3rd district Kong. Pablo John Garcia ug laing P55 mil gikan sa Provincial Federation sa ABC aron pagpaayo sa ilang barangay hall apan wala mahuman ang maong proyekto ug wala usab makahatag og liquidation kun giunsa sa paggasto ang maong pundo.

Sigon pa ni Anori nga kinabag-ang mga barangay kapitan nakahukom nga mopahigayon og kinaugalingong pakisusi ug moduso og petisyon nga gipirmahan sa 32 ka mga barangay kapitan gikan sa 42 ka mga barangay sa Barili batok sa maong opisyal dihang ilang nahibaw-an nga ang nahibilin sa ilang pundo P4 mil na lamang.

Nunot sa reklamo sa mga kapitan usa ka imbestigasyon nga gilusad sa buhatan ni Celis ug mipahigayon og tulo ka mga hearing labot sa maong petisyon apan nagdumili kini sa pagtambong hinungdan nga ang board members sa ABC Provincial Federation nakahukom nga tangtangon na lamang kini sa katungdanan.

Gisulayan sa pag-contact sa Banat News ang maong kapitan aron makuha ang iyang habig kabahin sa mga pasangil apan napakyas ang maong tinguha gumikan kay milarga ang kapitan.   (BANATNEWS)