CEBU, Philippines - Mukabat sa 30 ka mga pulis ug 14 ka mga professional diver sa Coral Point Dive sa dakbayan sa Lapulapu nagtambayayong sa pagpahigayon sa proyektong “coastal ug underwater clean up” didto sa lungsod sa Medillen kagahapon sa buntag.
Si Lapulapu City Police Office Director P/SSupt. Mariano Natu-el Jr. maoy nanguna sa pagpanghinlo sa baybayon ug sa ilawom sa kadagatan sa Isla sa Gebitngil sakop sa lungsod sa Medillen.
Matud pa ni SSupt. Natuel, nga ang maong kalihukan maoy unang higayong gihimo nila sa gawas sa Lapulapu.
Ang mga pulis maoy gidestino sa paglimpyo sa dapit sa baybayon samtang ang mga diver maoy mihinlo sa ilawom sa kadagatan sa maong isla.
Si Mayor Ricardo Ramirez sa Medillen sa sayo pa mihangyo kang SSupt. Natu-el nga magpatabang sila og hinlo sa kabaybayonan ug ilawom sa kadagatan sa Isla sa Gebitngil .
Matud pa ni Natuel nga wala sila mobalibad sa maong hangyo sa mayor sa Medillen sanglit usa usab sa ilang katungdanan ang pagpreserbar sa kalikupan.
Busa gikalipay kaayo ni Mayor Ramirez ang pagsanong sa Lapulapu City Police Office sa ilang hangyo gumikan kay ang maong Isla sa Gebitngil maoy usa ka lugar nga adunay nindot nga mga talan-awon sa ilawom sa dagat alang sa mga turista, apan naguba kini gumikan sa kanunay nga pagbomba og dinamita sa mga mapahimuslanong mananagat. (BANATNEWS)