Mga tulisan gikiha na

CEBU, Philippines - Kasong pagpanulis ang isang-at sa kapolisan batok sa duha ka banggiitang tulisan nga mitulis sa mga pasahero sa PUJ niadtong miaging gabii sa dalan M.C. Briones sa barangay Subangdaku, dakbayan sa Mandaue.

Ang duha ka suspetsadong nadakpan mao sila si Joselito Lanoy, 28 , ulitawo, nga taga barangay Umapad , ug Lenmark Flores, 24 , ulitawo usab nga taga barangay Looc, pulos sa dakbayan sa Mandaue.

Ang duha gigukod sa kapolisan human moreklamo ang mga pasahero sa PUJ nga gitulis sila sa maong mga suspetsado.

Nakuha usab og balik sa kapolisan ang mga cell phone, ug uban pang mga butang nga naglakip sa panty ug bra nga gipanag-iya sa usa sa mga pasaherong babaye nga gitulis sa mga suspek.

 Si SPO1 Dindo Montesclaros nga nahinabi sa Banat News miingon nga ang duha ka dinakpan nga tulisan mao usab ang suspetsado sa pagtulis sa San Jose Bakery sa nahisgotang lugar niadtong Hunyo 22 sa gabii.

Ang kahera sa maong bakery positibong miila sa mga suspetsado kay mao kini mition og armas de fuego kaniya ug gisakiyo ang halin niyang P2,500 .

Dugang pa ni SPO1 Montesclaros nga sa kasamtangan ilang gipaabot ang ubang mga biktima nga mobisita sa ilang buhatan aron ilhon ang mga dinakpan. (BANATNEWS)