CEBU, Philippines - Laing naugkat nga mga bukog sa mga biktima sa nalunod nga barkong Princess of the Stars nga iya sa Sulpicio Lines Inc. ang nahiabot niadtong milabay’ng adlaw ug gipanghatag ngadto sa mga nagbangutang mga pamilya sa mga biktima.
Si Chief Public Atty. Persida Rueda-Acosta ug ang forensic experts sa Public Attorneys Office nga si Dr. Erwin Erfe maoy nangulo sa pagpanghatag sa mga bukog ug personal nga gamit sa mga biktima.
Ang nauli ngadto sa mga pamilya mao ang mga butang ug bukog sa mga biktima nga sila si Sherly Rivera Lauron nga taga Tayod Liloan, Rogelio Quinapundan nga taga Consolacion ug Jose Leslie Blanco nga taga Negros Oriental.
Si Victoria Revira ang inahan ni Sherly Rivera Lauron midangoyngoy pagdawat sa mga butang sa iyang mga anak sama sa bag, sinina, ariyos ug wedding ring nga gibilin sa iyang bana sa wala pa kini mobiya sa abroad ug pipila sa mga bukog sa iyang anak.
Matud pa ni Victoria nga nakahilak siya sa kalipay ug kaguol tungod kay nahibalik niya ang iyang namatay nga anak atol gyud sa adlaw sa kinamanghuran anak ni Sherly nga si Mariza nga nagpangidaron og 3-anyos.
Duna pay laing anak ni Victoria nga si Marley ang missing.
Dugang pa ni Victoria nga hangtud karon ang bana sa iyang anak nga tua pa gihapon sa abroad wala pa nakahibalo sa gidangatan sa iyang asawa.
Samtang si Elisio Quinapundan maoy mikuha sa bukog ug mga sapot apil na ang mga gamit sa iyang manghod nga si Rogelio Quinapundan.
Sigon pa ni Elisio nga sa nadawat ug nakita niyang report nga may nakuha pang kwarta gikan sa iyang manghod halin sa gipangbaligya niining mga manok apan wala na kini malakip sa na-turnover sa PAO.
Iya hinuong giklarong wala na siya magkinahanglan sa maong salapi nga halin sa mga manok tungod kay mas importante ang nahibiling bahin sa parte sa lawas sa iyang manghod ug malubong kini sa desenteng lubnganan.
Samtang kalabira nalang ni Jose Leslie Blanco ang nakuha sa iyang magulang nga si Carlito Blanco sa Negros Oriental nga gitakdo ang porma sa ngipon sa iyang igsuon sa picture niini ug sa dental records sa iyang magulang lakip na sa itom nga sleeveless nga t-shirt ug ang bag ingon cheque book nga may pangalan pa sa iyang igsuon.
Si Acosta nagkanayon nga aduna silay nadala sa Sugbu nga kabahin sa 61 ka kalabera sa mga biktima gikan mismo sa nalunod nga barkong MV Princess of the Star sa Romblon ug nailhan pinaagi sa DNA test, anthropological analysis, medical ug dental records.
Apan ang uban madelatar og gamay gumikan sa pagpangkumparar nila sa ubang nakuhang impormasyon pagtakdo ngadto sa mga kalabera. (BANATNEWS)