Gun for hire nadakpan

CEBU, Philippines - Usa ka gipasanginlang gun for hire ug notadong tulisan ang nasikop sa Minglanilla Police Station kagahapon sa mga alas 12:15 sa hapon diha sa sitio Bantayan, barangay Tungkop, Minglanilla.

Ang suspetsado mao si Dondon Bogo, 29, taga sitio Bacay, barangay Tungkop Minglanilla kinsa dunay kasong murder.

Ang hepe sa Minglanilla Police Station nga si Chief Inspector Resty Santos uban nila ni SPO3 Rasul Fegismar, PO2 Raymond Hortezuela, PO2 Francisco Gorosin III ug PO1 Shan Delos Reyes miadto sa lugar human sila makadawat og impormasyon sa nahimutangan sa suspetsado.

Dala sa maong mga polis ang warrant of arrest nga giluwatan ni Regional Trial Court (RTC) Judge Sylvestre Maamo sa Branch 17.

Si Gorosin nga nahinabi sa Banat News kagahapon mibutyag nga si Bogo ug ang igsuon niining si Geofane mga giingong suspetsado sa pagdunggab ug pagpusil patay sa ilang silingan nga si Benjor Talisayon sa milabay’ng tuig.

Nakadagan sa maong operasyon ang igsuon ni Bogo uban sa wala mailhing tawo apan nakakuha ang mga polis gikan kang Bogo og lima ka paketeng shabu, drugs paraphernalia, usa ka kalibre .38 revolver nga dunay unom ka mga buhing bala, duha ka cutters, gunting, lighter, kutsilyo, ug sim pack.

Si Gorosin mibutyag usab nga ang magsuong Bogo giingong mga gun for hires usab kini ug suspetsado sa pagpatay kaniadto sa kapitan sa usa sa mga barangay sa lungsod sa Sibonga. Gawas sa pagka-gun for hire giingong suspetsado usab kini sa mga nahitabong tulis diha sa lungsod sa Minglanilla ug dakbayan sa Talisay.   – BANAT NEWS