Petisyon vs. pagbuwag sa 2 sitio sa Guadalupe gibasura

CEBU, Philippines - Pormal nga gibasura sa korte ang petisyong nagbabag sa plebisito sa pagbuwag sa Banawa-Englis gikan sa barangay Guadalupe human mapakyas ang nagpetisyon sa pagtambong sa pre-trial conference kagahapon sa buntag.

Si Regional Trial Court Judge Gabriel Englis mipakanaug sa desisyon human mapadayon ang oral argumentation sa pre-trial conference bisan pa man og wala pa ang petitioner nga si Victor Buendia ug abogado niining si Atty. Julius Entice.

Si Englis mitamod sa patakaran karon sa korte nga mahimong ma-dismiss ang kaso kun mapakyas sa pagtambong ang kihante ug ang abogado niini sa gikatakdang pre-trial conference.

Kini tungod kay pagpakita lamang kining wala nila hatagi og dakong bili ang gipasakang kaso.

Sumala pa ni Englis nga dili angayan   pang ipadayon pagdungog sa korte ang maong kaso sanglit wala may pagtagad sa habig sa nagpetisyon.

Gawas sa pag-dismiss sa kaso, wala na say legal impediments sa tinguha sa mga taga Banawa-English nga matigayon ang plebisito nga magbuwag kanila sa barangay Guadalupe.

Nasayran nga si Buendia miduso og petisyon sa korte aron sa pagpangayo og Temporary Restraining Order ug Injunction aron mababagan ang plebisito niadtong Marso 13 tungod kay wala maklaro ang Rosalina Village kun diin kini nasakop kun sa Guadalupe ba o sa Labangon.

Ang korte mihatag og 20 ka adlaw nga TRO nga nagdili sa pagpatuman sa plebisito sa Guadalupe. Apan nakapresentar na sa tanang mga dokumento ang mga miyembro sa organisasyon sa mga residente sa Banawa ug Englis ang nagmatuod nga sa Guadalupe nahisakop ang Rosalina Village. – BANAT NEWS