CEBU, Philippines - Gipangita sa kapolisan sa dakbayan sa Lapulapu ang usa ka hubog nga police nga nadestino sa Police Regional Office kon PRO-7 tungod sa pagpanion og armas ngadto sa kaubang police ug security guards sa sulod sa Mactan Export Zone MEZ police station sa barangay Pusok niadtong adlaw nga Miyerkules mga alas 7:32 kagabii.
Ang giingong hubog nga polis mao si PO1 Alex Baquerquer, 34, taga sitio Apro barangay Ibo dakbayan sa Lapulapu ug kasamtangan nga nadistino sa PRO-7.
Ang hepe sa MEZ Police, Gerardo Necesito mipahibalong ilang pasakaan og kaso ang maong polis ug nangita na ang ilang abogadong si Ranolfo San Juan og dugang ebidensya ug pamahayag batok sa maong polis.
Sigon pa ni Necesito, si Baquerquer hubog kaayong miadto sa headquarter sa MEZ 1 Police Station ug maisogong nangita kang Police/Sgt. Senen Sodario nga maoy nag-imbestigar sa iyang kaso kabahin gihapon sa pagpanion og armas sa milabay’ng buwan.
Apan tungod kay wala diha ang iyang gipangita gipangtionan niini sa iyang armas ang mga gwardiya sa maong buhatan lakip na sa mga gates.
Ang mga police sa MEZ1 nga gilangkuban nila ni Police/Sgt. Welfredo Arellano ug Manuel Quitalig miapas kang Baquerquer sa gate 5 sakay sa ilang patrol car aron unta pakalmahon kini apan wala sila makakanaog sa ilang patrol car ug gipangtiunan gihapon sila niini og armas.
Tungod niini nanawag sila og police assistance sa Lapulapu City Police Office ug miabot ang mga sakop sa Special Weapons and Tactics apan nakaeskapo na si Baquerquer sakay gihapon sa gikuhang motorsiklo. – BANAT NEWS