'Cop Killer' Nadakpan

CEBU, Philippines - Suspek sa pagpusil patay sa usa ka polis niadtong Hunyo sa milabay’ng tuig nasikop sa kapolisan sa Talisay niadtong Miyerkules sa gabii diha sa sitio Lawis, barangay Mambaling, dakbayan sa Sugbo.

Ang suspetsado mao si Anthony “Tonton” Aves, 24, kanhi nagpuyo diha sa sitio Litmon, barangay Poblacion, dakbayan sa Talisay nga silingan sa iyang gipusil nga si PO2 Benjamin Racaza nga nadestino sa Police Regional Office (PRO)-7.

Si Supt. Henry Biñas, hepe sa TCPS nga nahinabi sa mga tigbalita mibutyag nga duna silay nadawat nga impormasyon kabahin sa nahimutangan ni Aves hinungdan nga gisusi kini nila ni PO3 Arnold Damasco, PO2 Leandro Azarcon ug PO2 Stephen Sefuesca.

Si Aves naabtan sa mga polis diha sa giabangang balay nga naghigda ug ilaha dayon kining gidakop.

Kahinumduman nga si Racaza gipusil ni Aves diha sulod sa garahian sa balay niini samtang nagtan-aw sa panari nga manok nga buot ibaligya sa suspek ngadto sa biktima. Si Aves dihang nahinabi sa mga tigbalita mibutyag nga human sa insidente mibiyahe siya paingon ngadto sa dakbayan sa Maasin, Leyte ug mipuyo sa iyang uyoan dul-an usa ka buwan ug mibalhin ngadto sa Butuan ug mipuyo sa paryente sa iyang higala apan mibalik siya nganhi sa Sugbo.

Matud pa niini nga selos ang usa sa hinungdan nganong iyang gipusil ang maong polis tungod kay nakit-an niya kining miagbay sa iyang asawa.

Laing hinungdan sa iyang pagpusil sa biktima tungod kay gisugo siya sa iyang amigong si Orestes “Titing” Morada, si Morada maoy unang mipresentar nga testigo batok kang Aves human sa hitabo.

Matud pa ni Aves nga adunay ilegal nga negosyo si Morada gawas sa pagpamaligya niini og herbal medicine maong buot niyang ipapatay si Racaza. Si Morada wala pa mopatim-aw sa kapolisan.

Si Biñas sa iyang bahin, mibutyag nga niadtong menor de edad pa si Aves duha na ka tawo ang napatay niini ug napriso kini diha sa Operation Second Chance sa Cebu Provincial Development and Rehabilitation Center (CPDRC). - BANAT NEWS