Ceres Bus natumba, lola ug bata angol

CEBU, Philippines - Seryosong naangol ang 79-anyos nga lola ug 3-anyos nga bata samtang nakaangkon og ginagmay’ng pangos ang ubang pasahero ug ang drayber dihang natumba ang Ceres Bus niining gisakyan ug hapit na usab matagak sa bung-aw sa kurbadahong bahin sa sitio Eme barangay Damolog lungsod sa Sogod kagahapon sa alas 7:30 sa buntag.

Ang laing sakyanang nadisgrasya mao ang Ceres Bus dunay body number nga 8936 ug gimaneho ni Vicente Cerelegia, 35, ug molupyo sa barangay Basak lungsod sa Catmon.

Ang duha ka pasahero nga nakaangkon og seryusong kadaot mao si Vinencia Jagdon, 79, minyo ug molupyo sa siyudad sa Bogo ug ang 3-anyos nga batang babaye nga si Maricy Saladaga taga lungsod sa Tabogon.

Samtang ang drayber igo lang nakaangkon og gamay’ng pangos sa bukton ingon man ang ubang pasahero nga nag-iyahay ug pangambak og nangaratol sa maong panghitabo.

Matud ni Insp. Ramon Lacno, hepe sa Sogod Police Station dihang nahinabi sa Banat News maayong pagkalata sa tuong kamot sa 79-anyos nga lola ug hapit kini maputol human malugpiti ingon man usab ang 3-anyos nga bata nga napiit.

Subay sa imbestigasyon sa kapulisan ang Ceres Bus gikan sa Maya lungsod sa Daanbantayan ug paingon sa siyudad sa Sugbo ug pag-abot sa kurbadahong bahin sa maong lugar nga lugsongon kalit nga nawad-an og balanse ang bus dihang milabyog ang luyong bahin niini.

 Maayo nalang nga sa pagkatumba sa bus igo ra kining nabagnos tunga-tunga sa dalan ug wala malahos sa bung-aw nga gibana-banang 40 ka tiil ang gilawmon.

Ang mga biktima daling gihatud sa Juan Dosado Memorial Hospital apan ang duha ka seryusong naangol ang gibalhin sa tambalanan dinhi sa dakbayan sa Sugbo samtang ang ubang pasahero nakagawas dayun human matambali ang ilang ginagmay’ng pangos.  – BANAT NEWS