Resulta sa JD Tours probe iduso na

CEBU, Philippines - Iduso karong adlawa sa Cebu Provincial Police Office ngadto sa buhatan ni Police Regional Office-7 Chief Supt. Lani-O Nerez ang resulta sa imbestigasyon sa nahagbong nga tourist bus sa JD Rent A Car niadtong Hunyo 13 sa barangay Cansumoroy, Balamban nga mikalas og 20 ka mga Iranian ug drayber nga tag-iya nga si Jaime Batoon. Si Sr. Supt. Erson Digal, direktor sa CPPO mitug-an sa mga tigbalita nga migawas nga “mechanical error” ang hinungdan sa aksidente sa Cansumoroy. Kini maoy nasuta sa mekaniko sa JRA Surplus nga gi-hire aron mosusi sa nahagbong nga bus.

Matud ni Digal nga nasuta sa mekaniko nga naka-tersera si Batoon samtang nagdulhog ang bus sa Cansumoroy. Kini nagpasabot matud sa mekaniko nga kusog nga nagpadagan ang drayber nga si Batoon.

Si Digal miingon nga ang resulta sa imbestigasyon isukip sa rekomendasyon ngadto sa Land Transportation Office (LTO)-7 ug Land Transportation Franchising and Regulatory Board (LTFRB)-7 alang sa kasong posibleng atubangon sa sa tag-iya sa JD Rent A Car nga si Marcelyn Maremon, kapuyo sa namatay nga si Batoon.

Ang nahitabo sa Balamban nasundan usab sa barangay Poog sa dakbayan sa Toledo diin usa ka trailer truck ang midasmag sa manindahay og kandila atol sa besperas sa pista sa barangay nga mikalas og upat ka tawo ug miangol og laing walo. Si Mayor Arlene Zambo sa Toledo miawhag sa kapolisan nga butangan og mga sakop sa Highway Patrol Group (HPG) sa Poog tungod sa mga reklamo nga kusog kaayong magpadagan ang mga bus nga nagbiyahean og Toledo ngadto sa Tuburan.  – BANAT NEWS