'Bayot gipadakop

CEBU, Philippines - Usa ka mahuyang nga wedding planner ang gidakop sa kapolisan gumikan sa reklamo sa iyang mga kliyente nga gipangtabla niini ang ilang gibayad alang sa kasal ug debut party. Ang gidakop mao si Romel Pareja, 28, taga Basak Pardo gidakop diha sa usa ka hotel sa Lahug niadtong Biyernes sa hapon human ireklamo nila ni Anne Alfonso, John Wallas, Lucille ug Diosdado Alferez, Roselyn Tugao ug Ian Jeremy Yap ug laing duha pa ka biktima nga wala pa mailhi sa kapolisan.

Sumala pa sa abogado nila ni Alfonso ug Wallas nga si Atty. Manuel Legaspi mi-down og P200,000 sa P250,000 nga gipangayong bayad ni Pareja ang duha alang sa ilang kasal, apan human madawat wala na nila kini makontak.

Samtang mao usab ang reklamo nila sa mga Alferez nga nakabayad usab og P220,000. Sila si Yap ug Tugao usab mireklamong nakabayad na og P60,000 ug P35,000 alang sa debut party nga gitabla usab ni Pareja. Matud pang Sr.Supt, Melvin Buenafe sa Regional Investigation Division ang modus operandi ni Pareja mao ang pagpangayo og down sa mga gustong magpakasal o parties apan idagan niya kini. (BANAT NEWS)