Trailer miharos sa namista

CEBU, Philippines - Upat ang kompirmadong patay samtang walo ang nangaangol human maharos sa usa ka trailer truck van ang mga tawong namista diha sa barangay Poog sa dakbayan sa Toledo kagahapon sa hapon ug napiyapi ang tulo ka mga multicab diha mismo atubangan sa simbahan.

Si SPO3 Allan Barquin, hepe sa Traffic Division sa Toledo City Police Station sa pakighinabi sa Banat News miila sa mga nakalas mao sila si Efren Sitoy, 24; Ariel Roble, 19; Orlando Sunggayan, 32; ug Juliet Sunggayan, taga barangay Tutay sa lungsod sa Pinamungajan.

Si Lyan dela Peña ang nurse on duty sa Toledo City District Hospital sa report sa DyLA kagahapon nagkanayon nga gibalhin dayon sa mga tambalanan sa Sugbu ang mga nangaangol.

Giila ang nangaangol mao ang magtiayong sila si Eddie ug Laarni Hermoso, taga Awihaw dakbayan sa Toledo; magsuong sila si Adrian, 4, ug Arjie Sunggayan,10; Mike Henry Cañezares, 34; Peter Abadilla, 28; Avita Castañares, 45, ug Vilma Casas, 39, taga barangay Lalang dakbayan sa Danao.

Ang drayber sa CNT Trucking giilang si Joel Pepito, 31, taga Tulay lungsod sa Minglanilla. Samtang ang kompanyang gitrabahoan sa suspek gipanag-iya sa usa ka Edwin Casas nga taga barangay Dakit sa dakbayan sa Bogo.

Sumala pang PO3 Julius Sanchez ang scene investigator sa pakighinabi sa Banat News kagahapon nagpadulhog ang maong trailer truck van gikan sa siyudad sa Sugbu dihang kalit nawad-an og brake.

Sa tantong pagdulhog niini ug padulong liko sa tuo kalit nga nangatagak ang gikargang duha ka 20-footer container vans niini nga may sulod nga mga sako alang sa abuno nga dad-unon ngadto sa Atlas Fertilizers sa barangay Sangi sa dakbayan sa Toledo.

Si Pepito dihang gikahinabi sa Banat News sa telepono pipila ka gutlo human sa aksidente diha sa DAS Police Sub-station mibutyag nga kalit nga nibasiyo ang mga brakes sa iyang prime mover nga iyang giguyod.

“Ako gi-handbrake, akong gi- maxi-brake unya akong gikambyo wala man gyud mohunong sir. Pag-abot nako sa unahan sir pista man diay didto pwerteng daghana og tawo, daghan kaayo kong nadam-agan duna pay babaye siguro to,” matud pang Pepito kinsa gumikan sa kahadlok nga patyon mikaratel og dagan padulong sa DAS. Sumala pa niya nga gisuwayan niyang imaniobra ang truck gumikan kay bag-o pa kaayo kini apan gumikan sa kabug-at sa iyang karga wala gyud kini mohunong hangtud nga kalit nga nangatagak ang iyang karga ngadto sa mga tawo.

Matud pang Sanchez nga napiyapi og maayo ang duha ka multicab diha atubangan sa simbahan. Samtang duha sa mga nakalas ang nadat-ugan sa usa sa mga container vans ug ang laing duha gituuhang naigo samtang misaliring ang laing container van. (Uban sa report ni Lesley Caminade) (BANAT NEWS)