Gisaka sa balay gitusak sa bala
CEBU, Philippines - Usa ka batan-on ang gisaka sa ilang balay ug gitusak-tusak og dunggab sa wala pa mailhing tawo kagahapon sa kaadlawon diha sa sitio Ibabao barangay Basak sa dakbayan sa Lapulapu.
Ang biktima giilang si Rey Mertel Diatas, 21, nga usa ka empleyado sa fast food chain sa usa ka mall sa barangay Basak dakbayan sa Lapulapu kinsa nakaangkon og daghang samad dinunggaban sa iyang kalawasan.
Base sa imbestigasyon ni PO3 Dioscoro Arong sa Crime Against Persons Desk sa Lapulapu nasayran nga samtang natulog si Diatas sa iyang lawak gisulod kini sa wala mailhing tawo ug gidunggab.
Pasado alas-2 na kagahapon sa kaadlawon mapalgi ni Jomari Diatas (ig-agaw sa biktima) si Rey nga wala nay kinabuhi.
Matud pa ni Jomari wala siya’y namatikdang dunay kasikas nga misaka sa lawak ni Rey.
Sa pagresponde nila ni PO3 Arong nasutang adunay samad dinunggaban si Diatas sa iyang dughan ug duha ka mga bukton nga gituuhang hinungdan sa iyang hinanaling kamatayon.
Nasuta usab sa kapolisan nga giguba sa mamumuno ang mga kahoy nga gibangil sa bintana ni Diatas aron lamang makasulod ang kriminal.
Hangtud ning pagbalita wala pay nahipos nga motibo ang kapolisan sa pagpatay kang Diatas apan wala usab isalikway ang posibilidad nga tulis ang motibo sa pagpatay kang Diatas. (BANAT NEWS)
- Latest
- Trending
