CEBU, Philippines - Gidala na balik sa nasud sa Iran ang 20 ka mga patay’ng lawas sa Iranian nga medical students nga nangamatay atol sa trahedyang pagkatagak sa tourist bus sa barangay Cansomoroy lungsod sa Balamban.
Usa ka chartered plane nga Boeing 747 sa Iran Air miabot niadtong Sabado sa hapon ug gikargahan sa mga patay’ng lawas nga gisulod sa mga kahong ginama sa kahoy.
Sa wala pa mobiya ang abyon mga 12:03 kagahapon sa udto, gibendisyunan pinaagi sa Islamic nga tradisyon sa wala pa kini isakay sa Iran Air.
Atol sa pakigpulong ni Iran Ambassador to the Philippines nga Ali Monjataba Ruzbehani subli kining mipasalamat sa mga opisyales sa dakbayan sa Sugbu, lungsod sa Balamban ug sa mga Pilipinhon nga miabaga pagtabang sa ilang mga igsuong nakalas ug mga nangaangol.
Si Ruzbehani mipasabot nga masaligon siya sa gihimong imbestigasyon sa awtoridad sa Pilipinas ug midayeg sa gihimong aksyon kalabot sa pagsuspenso sa prangkisa alang sa imbestigasyon ang JD Tours and Rent a Car.
Ang Iran Air libreng nakatugpa sa MCIA ug gihatagan og parking space subay usab sa kamandoan sa gobiyerno butang nga gipasalamat usab sa opisyal sa Iran.
Matud pa ni MCIA Gen. Manager (Ret.)Gen. Danilo Francia gibanabanang kapin sa 100 mil dolyares ang kantidad sa pagtugpa ug paglupad og abyon sa maong airport.
Apan gumikan sa trahedya tawhanon lamang kaayong dili na sila pabayron.
Samtang si Cebu City Mayor-elect Michael Rama kinsa usa sa mga opisyal sa Sugbu nga mihatod sa mga patay’ng lawas mipasalig ngadto sa mga Iranian ambassador nga aduna gyu’y manubag sa maong hitabo.
Gipangita karon sa mga awtoridad ang usa ka giingong camera nga gituuhang nakakuha og video sa sulod sa bus pipila ka gutlo sa wala pa kini mahagbong sa bung-aw ug gituuhang adunay nakapunit niining mga tawo diha sa dapit.
Si Luzviminda Yap, usa sa mga survivor ug yaya sa usa ka tuig ug walo ka bulang kaluhang bata nga si Sayed ug Moyed Johani Hebitchi nakahilak sa katapusang pag pagsud-ong sa hulagway sa patay’ng lawas ni Moyed.
Matud pa ni Yap, si Sayed lamang ang iyang nasalbar sa maong trahedya gumikan kay si Moyed atua sa inahan gigunitan ug maoy namatay sa maong aksidente.
Si Ali Sabusi, ang katapusang survivor nga naugkat sulod sa nadisgrasyang bus mipadayag nga lisod na alang kaniya ang pagbalik dinhi sa Pilipinas gumikan sa maong aksidente.
Usa sa suod niyang higala ang nakalas sa maong hitabo ug dili sayon kaniya kalimtan kini.
Mibiya ang Iran Air sa MCIA nga 12:03 kagahapon sa udto direkta padulong sa Tehran, Iran sulod sa 10 ka oras nga biyahe ug pag-abot na didto hugasan ang mga patay’ng lawas pag-usab base sa ilang kultura ug puston kini og puti nga panapton sa dili pa kini ilubong. – BANAT NEWS