CEBU, Philippines - Gihingusgan sa mga opisyal sa siyudad sa Sugbo nga masigurong limpyo ug luwas kan-on ang tanang mga baligyang pagkaon sa mga pampublikong tunghaan dinhi sa siyudad. Si Konsehal Arsenio Pacaña gikatakdang mopasar og resolusyon atol sa sesyon karung Miyerkules nga mag-awhag sa Department of Education pagpakig-alayon sa Department of Health (DOH) ingon man City Health Department aron subsub nga ma-monitor ang tanang mga manindahay og pagkaon sa mga palibot sa tanang publikong tunghaan dinhi sa dakbayan.
Gipasabot sa konsehal nga gihimo niya kining maong lakang nunot sa subling pagbukas sa klase ug aron masigurong limpyo ug malikay sa food poisoning ang mga tinun-an.
Gipahaom sa konsehal ang maong lakang nunot usab sa nagsingabot nga kasaulogan sa Nutrition Month karung bulan sa Hulyo. Gihimong sanglitanan sa konsehal ang mga panghitabo sa food poisoning sa mga tinun-an sa lain-laing dapit dinhi sa dakbayan ug probinsya sa Sugbo human makakaon og mga dili na limpyo nga pagkaon nga dunay kagaw.
Buot ni Pacaña nga monitoron sa mga hingtungdang ahensya ang mga sidewalk vendors sa mga palibot sa tunghaan.
Nunot niini gitambagan usab sa konsehal ang mga ginikanan nga mas maayo og pahimangnoan og pabawnan og pagkaon ang mga anak niining motungha aron dili kaayo magsalig pagpataka og palit sa mga pagkaong baligya gawas sa tunghaan. (BANATNEWS)