Nagduyan gikaligoan og bala sa gang man

CEBU, Philippines - Kritikal ang kahimtang sa usa ka lalaki human kini pusila sa usa ka sakop sa gang diha sa sitio Basak Eskwelahan dakbayan sa Lapulapu kagahapon sa kaadlawon.

Ang biktima mao si James Tampus, 26, residente sa maong dapit samtang ang namusil mao ang 17-anyos nga silingan kinsa padayon pang gipangita sa kapolisan. Base sa pasiunang imbestigasyon sa kapolisan nasayran nga mga alas 12:10 kagahapon sa kaadlawon samtang naghigda si Tampus sa ilang duyan kalit nga giduol sa suspek dayong pusil kaniya.

Si Tampus nakahiagum og unom ka mga samad pinusilan sa iyang kalawasan agi sa kalibre .45 nga armas ug gidala sa tambalanan sa Lapulapu City Hospital apan giduso kini ngadto sa Vicente Sotto Memorial Medical Center ug talandugon ang kahimtang.

Ang suspek dali usab nga miikyas human sa hitabo samtang ang kapolisan wala pa makakuha og lead sa motibo sa pagpamusil apan gikatahong ang suspek nalambigit na usab sa pagpamusil diha sa Marigondon sa milabay’ng bulan ug padayong gipangita sa kapolisan. (BANATNEWS)