Mayor Soc andam masuspenso

CEBU, Philippines - Si Talisay City Mayor Socrates Fernandez mitumbok nga wala siyay pagsupak kun tangtangan siya sa Department of Interior and Local Government (DILG) og supervisory power sa kapolisan ug sa pagsuspenso sa iyang katungdanan.

 Kini tungod lamang sa iyang pagpanghilabot sa mga ebidensiya sa kapolisan sa mga kaso nga giatubang sa iyang anak nga si Joavan Fernandez.

 Sumala ni mayor Fernandez sa interview sa DyRF nga dili siya mahinugon niining tanan.

 Gipasabot usab ni Mayor Fernandez nga wala siya moabuso sa iyang gahum isip mayor sa Talisay aron lamang maprotektahan ang mga dautang gihimo sa iyang anak nga si Joavan.

 Iya usab nga gihimakak ang nanggawas nga balita nga matud pa iyang gipatawag ang mga kapolisan sa Talisay ug gikasab-an tungod sa pagpiit niini sa iyang anak.

 Giklaro sa mayor nga andam siyang muatubang sa kasong obstruction of justice, grave misconduct ug abuse of authority nga gisang-at sa kapolisan batok kaniya ug masaligon siyang makalingkawas siya sa maong kaso. - BANAT NEWS