Opisyal sa trapiko gisumbag knock down

CEBU, Philippines - Usa ka supervisor sa mga traffic enforcers sa dakbayan sa Talisay ang na-knock down human sumbaga sa usa ka drayber sa traysikol nga iyang gidakop kagahapon sa buntag diha ubos sa flyover sa barangay Tabunok sa nahisgutang siyudad.

Ang biktima mao si Ruben Empaces, 39, miduso og reklamo diha sa Talisay City Police Station batok kang Ronaldo Iñigo, 25-anyos drayber sa traysikol.

Si Empaces nga nahinabi sa Banat News kagahapon mibutyag nga niadtong Huwebes sa buntag iyang nadakpan ang suspetsado tungod kay mihunong kini sa “no stopping” nga dapit.

Kagahapon sa buntag iyahang nakit-an si Iñigo nga mihunong na usab sa “no stopping” hinungdan nga iyang giingnan nga “nagpabadlong na pod ka kagahapon pa gani ka nako gidakop.”

Apan human niya kini mapahimangnoi kalit mikanaog ang suspek sa traysikol ug dayong sukmag sa tuong dunggan ni Empaces, gumikan sa kakusog sa kinumo na-knock-down ang enforcer.

Wala pa gyud matagbaw ang suspetsado gitukmod pa niini si Empaces dihang nakabarog na kini gikan pagka-knock down.

Ang ubang mga kaubang enforcer ni Empaces nga diha sa duol daling mitabang ug gisikop ang suspetsado.

Si Iñigo nga nahinabi sa Banat News mibawos og pasangil kang Empaces nga gihulbutan siya niini og pusil hinungdan nga naniguro siya maong gisukmag niya kini.

Giangkon usab ni Iñigo nga mihunong siya sa “no stopping” tungod kay dunay usa ka tiguwang nga mipara ug iyahang gipasakay ug kung modiretso siya og padagan madisgrasya ang nahisgutang tiguwang. Matud niini nga gihangyo niya si Empaces nga ubos nga violation lang ang i-isyu ngadto kaniya apan “no stopping” ang giisyu sa enforcer ngadto kaniya nga may multang sobra sa P1,200.

Si Empaces sa iyang bahin, mihimakak sa pasangil ni Iñigo bahin sa armas, matud sa biktima nga posas maoy iyang gihulbot ug dili pusil. - BANAT NEWS