Clean Up Drive karon

CEBU, Philippines - Liboan ka mga molupyo sa 51 ka mga coastal ug urban barangays sa siyudad sa Sugbu uban sa nagkadaiyang mga volunteers ang magdungan panglimpyo karong adlawa sa mga kasapaan isip pagpangandam sa umaabot nga La Niña.

Ang maong programa gipangulohan sa Coastline Management Board sa siyudad uban sa pakigtambayayong sa City River Management Board uban sa tema nga “La Niña nagpadulong na, mangandam na ta.” Matud sa hepe sa Department of Public Services nga si Engr. Dionisio Gualiza nga miboluntaryo usab ang pipila ka non-government organizations sa maong kalihukan.

Samtang gidasig usab ni Mayor-elect Michael Rama ang tanang residente sa siyudad nga moduyog sa kalihukan karong adlawa pinaagi usab sa pagpanglimpyo sa ilang mga tugkaran partikular kadtong namuyo dapit sa sapa.

Panghinaot ni Rama nga dili unta magpataka og labay ang mga tawo sa ilang mga basurahan ngadto sa sapa aron malikayan ang mga sakit nga posibleng mahiaguman sa mga tawo nga namuyo sa maong dapit.

Mao na kini ang ika-19 nga coastal cleanup nga gihimo sa siyudad nga matigayon matag tulo ka buwan ug matud pa ni Rama nga ang   nahisgutang kalihukan napamatud-ang nagpabilin pang buhi ang barangayan, bayanihan ug bolunterismo. - BANAT NEWS