Kagawad gisikop labot sa ambush

CEBU, Philippines - Usa ka barangay kagawad ang gidakop sa mga ahente sa National Bureau of Investigation (NBI)-7 kagahapon sa kaadlawon atol sa pagpangronda sa balay niini sa barangay Sangat sa lungsod sa San Fernando may kalambigitan sa pagbanhig patay sa bana sa barangay kapitan sa barangay Cantao-an dakbayan sa Naga niadtong Hunyo 4 sa gabii.

Ang nadakpan mao si barangay Sangat Kagawad Jay Nino Castañares, molupyo sa maong lugar.

Ang mga ahente sa NBI pinangulohan ni executive officer Atty. Ernesto Macabare mironda sa panimalay sa suspek subay gihapon sa nagpadayong follow up operation kabahin sa maong hitabo.

Namatay sa maong pagpamanhig ang bana ni Kapitan Fe Gudoy sa barangay Cantao-an niadtong Hunyo 4 sa gabii nga si Florante Gudoy kinsa nakaangkon og samad pinusilan sa iyang kilid.

Atol sa pagronda, si Castañares nakuhaan og usa ka .45 nga kalibre sa armas, dunay buhing bala, usa ka paketeng ang sulod gituohang shabu ug drug paraphernalia.

Ang magtiayong Gudoy uban sa ilang anak ug usa ka tanod gikan sa victory party niadtong Hunyo 4 sa gabii sa nasubliang mayor sa Naga nga si Valdemar Chiong.

Sa ilang pagpauli, ang namatay maoy nagmaneho sa ilang sakyanan ug nakamatikod silang adunay nagsunod-sunod kanilang motorsiklo ug nagpunay og sikit ug pipila ka metros gikan sa balay sa magtiayon kalit nga mi-overtake kanila ang maong motorsiklo nga may luwang duha ka lalaki.

Diha-diha kalit nga gipaulanan og bala sa angkas ang bintana sa habig sa gilingkuran sa bana sa kapitana.

Si Florante gidala sa South General Hospital sa maong dakbayan apan pipila ka gutlo ang nakalabay nakabsan kini sa iyang kinabuhi.

Kagahapon sa buntag dihang gi-presentar sa media si Castañares wala makapugong sa pagpatulo sa iyang luha si Fe sa dihang nagkaabot sila sa suspek.

Si Castañares hugtanon hinuong mihimakak nga may kalambigitan siya sa maong krimen sanglit wala gyud siyay kasayuran sa maong hitabo.

Apan positibo kining gitumbok sa mga anak sa kapitan kagahapon nga mao gyuy mipusil sa ilang amahan sanglit diha sila sa luyo sa sakyanan maglingkod niadtong tungura.

Nagduda ang kapitana nga dunay nagsugo sa suspetsado aron ipapatay ang iyang bana.

Si NBI-7 executive officer nga si Atty. Ernesto Macabare miingon nga nihaom gyud sa cartographic sketch ang hulagway ni Castañares.

Si Macabare nagkanayon nga ila nang gihikay ang mga ebidensya alang na sa tukmang pagpasaka sa kasong murder, illegal possession of firearms ug ingon man paghupot og ilegal nga drugas ug paraphernalia.

Dugang usab nasayran, si Castañares wala na motungha sa mga sesyon sa barangay sukad nahitabo ang pagpatay niadtong Hunyo 4 sa gabii.

Sa gihimong pakisusi nasuta nga dili lisensyado sa Firearms and Explosive Security Agency Guards Supervision ang armas nga .45 nga pistola ni Castañares. – BANAT NEWS