CEBU, Philippines - Gidemalas ang usa ka gipasanginlang tulisan human gisuklan sa iyang biktimahong drayber sa taksi human mailogan sa iyang kutsilyo ug mao hinuoy nadunggaban niadtong milabay’ng kaadlawon diha sa barangay Tabok, dakbayan sa Mandaue.
Ang gisuwayan og tulis apan misukol mao si Jose Nelson Dayday, 33, taga Tunghaan sa lungsod sa Minglanilla ug drayber sa KEN taxi nga nagdala sa plate number YDY 646.
Si PO2 Milven Pelayo sa kapolisan sa Presinto 3 sa Basak Police Station miingon nga nagpahatud ang maong tulisan nga may kaubang gibana-banang nagpangidaron og 10-anyos sa barangay Tabok sa maong dakbayan.
Apan pag-abot sa maong dapit kalit siyang gitionan og kutsilyo ug mideklarar og tulis apan nakahigayon pakigbugno ang biktima ug nailogan niini og kutsilyo ang lalaki ug naduslakan ang ulo niini.
Gumikan niini daling nanganaog ang duha ug mikaratil og dagan ug wala na igkita. Si Dayday igo nalang miadto sa kapolisan ug misumbong sa hitabo. - BANAT NEWS