Nars gi-'rape' sa ka-boardmate

CEBU, Philippines - Usa ka rehistradong nars midangop sa kapolisan human gilugos sa iyang ka-boardmate sulod sa kasilyas sa ilang boarding house sa dalan Urgello, barangay Sambag I kagahapon sa buntag.

Ang nars   nagpangi-daron og 23-anyos ug temporaryong nagpuyo sa boarding house sa maong lugar.

Ang gitumbok nga naglugos kaniya nailhan sa ngalan nga Junjie Loyola, 33, lumad nga taga barangay San Jose, lungsod sa Catmon.

Sa pakighinabi sa Banat News sa hepe sa Fuente Police Station, Chief Insp. Michael Anthony Bastes, mibutyag kini nga ang nars inubanan sa iyang igsuon nga midangop sa ilang buhatan aron sa pagsumbong nga gi-rape kini ni Loyola.

Matud pa ni Chief Insp. Bastes nga base sa gisaysay sa biktima nga gipahimuslan siya sa iyang pagkababaye sulod sa kasilyas sa ilang boarding house.

Apan si Loyola sa dihang nahinabi sa Banat News mihimakak nga adunay rape nga nahitabo.

Giasoy niya nga sa dihang buntag na siya nga naabot sa lawak, iyang naabtan ang nars nga naghigda sa sala sa maong boarding house.

Sumala pa niya nga iyang giingnan ang nars nga pasudlon sa iyang kuwarto ug misulod kini ug sa kalit lang naabot ang mga higala sa biktima ug gipangita siya nga diha sulod sa iyang kuwarto.

Matud niya nga human nila gisaw-an ang lawasnong kalipay, migawas ang biktima nga nagdaling miadto sa kasilyas. Dugang pa niya nga iya pa ganing giingnan ang biktima nga mag-estorya sila nianang pagkahapon tungod kay iyang nakit-an ang biktima nga naghilak na.

Apan pipila ka minutos, iyang gikatingala nga adunay nanglabay og mga butang sa iyang kuwarto gikan sa taas nga bahin sa boarding house hinungdan nga milakaw siya paingon sa bilyaran.

Apan wala niya damha nga gipadakop diay siya sa biktima.

“Ug na-rape pa nako siya misinggit unta siya katong gipangita siya sa iyang mga friends,” matud pa ni Loyola.

Samtang si Chief Insp. Bastes sa iyang bahin mibutyag nga kusganon gyud nga mopasaka og kaso ang biktima batok ni Loyola. – BANAT NEWS