Barko mibangga sa pier

CEBU, Philippines - Napikas ang pantalan sa Toledo Power Corp. sa barangay Daan Lungsod, dakbayan sa Toledo human gibanggaan sa usa ka domestic cargo vessel kagahapon sa alas 4 sa hapon.

Ang MV Sycamore Global-1 paingon untang magdiskarga og mga coal alang sa Toledo Power Plant sa Cebu Energy Development Corp.(CEDC) sa dihang mibangga kini sa pantalan sa TPC.

Ang maong barko gipanag-iya sa OroPhil Shipping International Inc. kang kansang buhatan nahimutang sa Floor Knights of Rizal Building, A. Bonifacio Drivem Port Area, Manila, ug aduna kini gibug-aton nga 11,193 metrikong tonelada.

Si Chief Petty Officer Manuel Tapang sa Philippine Coast Guard Toledo City Detachment nagkanayon sa dihang nahinabi sa Banat News nga subay sa ilang imbestigasyon, nga ang MV Sycamore Global-1 ubos sa pagdumala ni ship Captain Cerelo Samson.

Apan wala hinuon mahibaw-i sa mga imbestigasyon sa Philippine Coast Guard kun si Capt. Samson ba ang personal nga nagmaneho sa barko sa dihang nabangga kini ngadto sa pantalan sa Toledo.

Gibutyag ni CPO Tapang nga sakay sa maong barko ang 22 ka mga tripulante, siyam niini mga opisyal.

Matud pa niya nga gikan kini sa Semarara, Antique diin gikarga ang mga coal alang sa TPC. Apan sa dihang naabot ang MV Sycamore Global-1 sa pier 3, imbes molugar kini aron hakoton ang mga karga nga coal, mibangga na hinuon kini.

Tungod niini, napikas gyud ang pantalan ug nasuta sa mga imbestigador nga miabot og 30 metros ang gitas-on sa pikas.

Si CPO Tapang nagkanayon nga nalumping ang atubangang bahin sa barko, apan walay naangol sa maong insidente.

Atol sa pagsulat ning balita, si CPO Tapang nagkanayon nga padayon pa sila sa ilang imbestigasyon.

Ang kapitan sa maong barko wala pa mohatag ngadto kanila og pamahayag, apan gikatakdang mosang-at kini og marine protest sa buhatan sa Philippine Coast Guard.

Si Capt. Samson miingon lamang og “more on accident” ang hitabo ngadto kang CPO Tapang.

Si Mae Melchor, corporate communications officer sa CEDC, mipadala og pamahayag sa Banat News ug nagkanayon nga giimbestigar na ang maong hitabo.

Giseguro ni Melchor nga dili maka-apekto sa generation ug delivery sa kuryente ngadto sa mga Sugboanon tungod kay ang bag-ong pier sa CEDC padayon nang nagdawat sa idiskargang mga coal alang sa duha ka planta.

Si Melchor nagkanayon nga unom ka mga haligi ang nadaot sa pagbangga sa MV Sycamore Global-1.

Gipaneguro hinuon sa tagdumala sa OroPhil nga walay coal spill. International surveyors mopadayon og susi sa insidente. – BANAT NEWS