Polis nanghatag sangkap sa mga bata

CEBU, Philippines - Ang Mabolo Police Station nagpahigayon og usa ka programa nga Adopt-a-School Program sa eskuylahan sa kagamhanan sa barangay Mabolo ning dakbayan sa Sugbo sa miaging Martes.

Napili nila ang   Bagong Lipunan Elementary School sa maong barangay diin sila nanghatag og mga lapis, eraser, sharpener, papel, krayola, ug plastic envelop ngadto sa 70 ka mga nagtungha sa Kinder II sa maong eskuylahan.

Ang pagpanghatag nila sa mga kasangkapan sa pagtungha gipangunahan ni Chief OIC David I. Señor, uban ni Deputy Chief Erlando Y. Metante, PO3 Emerson Isidro, nga usa sa nahimamat sa Banat News, Rowena Sumalpong, ug uban pang mga kawani sa maong buhatan sa kapolisan.

Ang magtutudlo sa Kinder II nga si Michele F. delos Santos mipadayag sa iyang kalipay sa programa sa kapolisan sa Mabolo Police Station.

Bisan ang mga ginikanan sa nanagtunghang kabataan mipadayag usab sa hilabihang kalipay ug nagpasalamat sila sa mga kapolisan.

Matud pa ni PO3 Isidro, nga ang ilang gihimo maoy pagtuman sa programang gipasiugdahan sa Cebu City Police Office nga gipangunahan ni Police Senior Superintendent Patrocinio Comendador.

Midugang siya nga gawas sa ilang pagpanghatag og mga kasangkapan sa pagtungha sa kabataan, nangita usab sila og lawak nga gubaon sa maong tulunghaan kay ila kining hinay-hinayan pag-ayo, hangtod nga magamit kini sa mga estudyante, matud pa ni Isidro.

Sumala pa ni PO3 Isidro nga mokabat og P2,500 ang gigahin nila para sa mga kasangkapan nga ilang gihatag nga libre ngadto sa mga estudyante.

Kining maong programa gipatuman halos sa tanang mga police station ning dakbayan.

Miingon usab si PO3 Isidro nga karong nasugdan na nila ang maong programa, ipatuman na nila kini matag tuig sanglit ang kapolisan mogahin naman og pundo alang niining maong proyekto.  - BANAT NEWS