Sanchez suporta kang Barcenas

CEBU, Philippines - Suportado ni bise gobernador Greg Sanchez Jr. ang rekomendasyon sa Integrated Bar of the Philippines (IBP)Cebu City chapter kang Atty. Democrito Barcenas nga mamahimong Undersecretary sa Department of Justice (DOJ).

Matud sa bise gobernador nga sakar ug kwalipikado kaayo si Barcenas sa maong posisyon tungod kay gawas nga nahimo kining acting vice governor sa Sugbo niadtong 1986 hangtud sa 1988, na-ila na usab kini nga tigpanalipod sa tawhanong katungod.

Gihangop ni Sanchez ang rekomendasyon sa IBP Cebu City chapter kang Barcenas ug mipasalig usab kini nga mo-endorso sa maong rekomendasyon ngadto sa kadagkuan sa Liberal Party (LP).

Si Sanchez maoy runningmate sa standard bearer sa LP dinhi sa Sugbo nga si kanhi konsehal Helario Junjun Davide III nga gipildi ni Gobernador Gwen Garcia sa milabay’ng pinili-ay niadtong Mayo 10.

Nasayran nga si Barcenas naila usab nga usa sa mga kritiko ni Garcia ug nagsilbing chairman sa Noy and Mar for president Movement dinhi sa Sugbo sa milabay’ng pinili-ay.

Nagtuo si Sanchez nga dili ihikaw ni President-elect Benigno Aquino III ang maayong puwesto alang kang Barcenas.  - BANAT NEWS