Kawani's forwarder gitulis, gipatay
CEBU, Philippines - Namatay dihadiha dayon ang usa ka kawani sa forwarding company
sa dakbayan sa Lapulapu kinsa gituohang gitulis ug gipusil sa wala hiilhing mga kriminal didto sa barangay Upper Tabok, dakbayan sa Mandaue sa miaging gabii.Ang biktima mao si Rossman Guaves, 25, ulitawo, nga taga dalan Magallanes, barangay Baring, lungsod sa Carmen, apan nagtrabaho sa Lexmark sa Mepz II, sa dakbayan sa Lapulapu ug kasamtangang nagpuyo sa Tabok, dakbayan sa Mandaue.
Si PO3 Joselito Catabas sa Investigation Detection and Management Bureau ug mga kaubanan kinsa maoy mitubag sa alarma mibutyag sa Banat News nga nailhan nila ang biktima pinaagi sa company ID niini .
Matud pa niya nga nawagtang na ang pitaka sa biktima ug gituohang gisakiyo kini sa mga tulisan nga mipatay kaniya.
Midugang si Catabas nga usa ka drayber sa habal-habal nga nailhang si Rosinel Sugarol kinsa nakasaksi sa hitabo mibutyag sa mga polis nga may gikalalis ang biktima nga duha ka wala hiilhing lalaki unya milanog lang og kalit ang mga buto sa armas de fuego.
Laing testigos usab nga si Marhel Marbilla, 18, nagpuyo usab sa dapit nga nahitaboan midason usab sa pamahayag ni Sugarol. Unya human mahagba ang biktima sa yuta nga nasabak sa ulo ug dughan, gibiyaan lang usab dayon kini sa mga kriminal.
Matud pa ni PO3 Catabas nga malagmit gitulis gyud ang biktima, apan ilang gipanid-an karon ang mga kriminal. - Uban sa report Iris D. Bulambao (BANAT NEWS)
- Latest
- Trending
