Suspensyon sa JD Tours giimplementar kagahapon

CEBU, Philippines - Pormal nang gi-served kagahapon sa udto sa dakbayan sa Lapulapu ang suspension order gikan sa Land Transportation Office (LTO)-7 ug sa Land Transportation Franchising and Regulatory Board (LTFRB)-7 ngadto sa tag-iya sa JD Tours rent a car.

Ang LTFRB mipahamtang og 30 ka adlaw nga suspensyon sa mga sakyanan sa JD Tours human sa aksidente niadtong Domingo sa buntag sa barangay Cansumoroy sa lungsod sa Balamban.

Kini mikalas og 21 ka mga tawo diin 20 niini mga Iranian ug ang drayber nga si Jaime Batoon nga kapuyo ni Marcelyn Marimon ang tag-iya sa maong kompanya.

Si Marimon mismo ang midawat sa suspensyon sa LTFRB kagahapon.

Si LTO-7 regional director Atty. Raul Aguilos nagkanayon nga ang detalye sa suspension dad-on ang tanang mga sakyanan sa JD Tours sa Motor Vehicle Inspection Service sa dakbayan sa Mandaue alang sa Road Worthiness Inspection.

“After that I will confiscate license plate, then after that I will issue (TOP) kon Temporary Operators Permit to make sure that they will not operate within the period of 30 days, provided for the suspension order,” matud pang Aguilus. Gipasabot ni Aguilos nga ang tanang drayber sa JD Tours ipaubos sa training seminars apil na niini ang written ug actual examinations.

Siya mitataw nga ilang gikuha ang lisensya sa tanang drayber sa JD Tours ug giisyuhan og TOP aron klaruhon kun unsa usab ang designation sa maong mga drayber.

Ang anaa sa suspension order sa LTFRB mokabat sa 33 ka mga sakyanan sa JD Tours.

Kuyog sa pagpatuman sa maong suspension order kagahapon mao ang bag-ong regional director sa LTFRB-7 nga si Benjamin Go.

Si Marimon sa iyang bahin nihangop ug gidawat ang tanang detalye sa kamanduan sa suspension order sa FTFRB ug mipasalig nga iyahang tumanon ang tanang kamandoan.

“We need to comply kay legal man atong negusyo, so kinahanglan mo-follow pud ‘ta sa due process, aron makabalik dayon atong pagdagan sa atong mga sakyanan,” matud pang Marimon.

Iyang gipahibawo nga nagsugod ang ilang negosyong rent-car niadtong tuig 2006 apan kadto maoy unang trahedya nga nahitabo sukad magsugod ang ilang negosyo.

Samtang gihimakak ni Capitol Consultant on Information Atty. Rory Jon Sepulveda nga walay natabang ang Kapitolyo sa mga nabiktima nga giingong gisaway sa publiko.

Matud pa ni Sepulveda nga ang provincial social welfare officer miadto sa maong dapit ug mitabang og facilitate sa gipahigayon nga search and retrieval operations. – BANAT NEWS