42 ka bolitas miangol sa 13-anyos

CEBU, Philippines - Nabulit sa samad pinusilan ang 13-anyos human gitabangan og pusil sa duha ka gwardiya gamit ang shotgun diha sa compound sa Shemberg Biotech sa barangay Cogon West lungsod sa Carmen niadtong Domingo sa hapon.

Ang biktima mao si Ronnie Morales Basan, 13, molupyo sa maong lugar samtang giila ang mga suspek nga mao sila si Joel Bacus Campaña ug Renato Daño Ompad, mga sakop sa Archangel Security Agency nga nadestino sa maong compound.

Matud ni SPO2 Renerio Masocol sa Carmen Police dihang nahinabi sa Banat News, nanguha og kompay aron ilawog sa iyang mga hayop ang biktima dala ang sanggot ug pitik kauban ang unom ka mga barkadang bata nga nagpangidaron og 3,4,9,7 ug 10-anyos.

Apan giingong gibadlong sila sa caretaker sa maong compound nga si Micheal Cabilles tungod kay dili pasudlan ang maong lugar hinungdan nga mitubag ang biktima aron paghatag og katin-awan.

Tungod kay nakakita ang caretaker sa sanggot ug tirador nga dala sa biktima misumbong kini sa duha ka gwardiya diha sa guardhouse kinsa dali usab nga miresponde.

Ang kapolisan wala pa makahatag og hustong detalye kun giunsa pagkahitabo nga gipusil sa maong mga gwardiya ang bata human mosumbong si Cabilles kanila.

Apan gikatahong adunay nakasaksing miingon nga gitabunan sa biktima ang mga higalang bata sa iyang lawas hinungdan nga nasalod sa batan-ong lawas, tiil ug kamot niini ang 42 ka bolitas gikan sa shotgun sa maong mga gwardiya. Ang maong bata gidala sa Vicente Sotto Memorial Medical Center.

Hinuon nadakpan dayon sa mirespondeng mga polis ang maong duha ka gwardiya ug nagtingkagol na karun sa karsel alang sa pagpasaka og pormal nga kaso.

Samtang usa ka 28-anyos nga si Nico Batoon taga Guisok, Tuburan Sur sa dakbayan sa Danao ang naangol human gi-shotgun sa gwardiyang si Angelito Sumedo Carcela, 36, nga magbalantay sa Club Filipino de Cebu sa barangay Looc sa dakbayan sa Danao.

Sumala pang SPO1 Lolito Oliveros nasakpan ni Carcela si Batoon nga mikuha sa mga kural sa maong golf course ug misuway pagdagan hinungdan nga gi-shotgun ug naigo sa walang bukton, ilok ug ulo ug gidala sa Vicente Sotto Memorial Medical Center. - Uban sa report ni Lalaine Mae Calatrava (BANAT NEWS)