Drayber sa taxi gitipi

CEBU, Philippines - Patay ang usa ka taxi driver human kini gitusaktusak sa usa ka car-painter pasado alas-8 sa miaging gabii sa sitio Laray Panagdait barangay Mabolo ning dakbayan.

Ang biktima nailhan nga si Jonathan “Don-Don” Batan Sara, usa ka taxi driver ug molupyo sa sitio Riverside-B barangay Subangdaku syudad sa Mandaue, samtang ang suspetsado nailhan nga si Andres “Bador” Estrada Albino molupyo sa maong lugar.

Base sa imbestigasyon sa kapolisan nga samtang naglakaw ang biktima uban sa duha ka higala niini nga sila si Jeffrey ug Junjun padulong sa basketball court sa nahisgutang lugar dihang kalit nga mipatim-aw ang suspetsado ug sa walay igong hinungdan midunggab ngadto sa biktima nga miresulta sa pagkahagba niini.

Apan ang suspetsado wala pa gyud matagbaw gitusak niini og dunggab ang biktima una pa kini mipalayo.

Ang mga sakop sa Emergency Rescue Unit Foundation (ERUF) nga miresponde sa maong insidente daling mitabang sa biktima apan wala na silay nahimo pa.

Ang biktima nakaangkon og tulo ka samad dinunggaban diha sa dughan ug usa sa likod nga nakaingon sa kamatayon niini.

Samtang sa pakisusi sa kalawasan sa biktima nakuha gikan sa iyang bulsa ang P254 ug usa ka cellphone.

Apan matud pa sa igsuon sa biktima nga si Luella Batan Nisnisan nga niadtong Nobiyembre 2006 ang biktima gipasakaan og kasong Physical Injuries sa suspetsado apan na dismissed kini niadtong Enero 2010.

Kasamtangan karong nahimutang ang patay’ng lawas sa biktima sa St. Margaret Funeral Homes alang sa ipahigayong awtopsiya. (BANATNEWS)