Demalas nga piknik, 20 tipi

CEBU, Philippines - Usa ka ngilngig nga kamatayon ang gidangatan sa 20 ka tawo nga naglakip sa mga Iranian medical students gikan sa tulo ka mga dagkong medical schools sa dakbayan sa Sugbu kagahapon human matagak sa bung-aw sa sitio Z, Buli, barangay Cansomoroy, lungsod sa Balamban ang ilang gisakyang tourist bus.

Ang mga biktima naglakip usab sa Pilipinong doktor ug mga bata nga mikuyog sa picnic. Nanggula dayon ang pagdudang posibleng overloaded ang bus gumikan kay 40 seater ra kini.

Sa inisyal nga impormasyon sa Central Command gikan ni Maj. Wilson Feria ang tigpamaba sa militar sa report sa DyAB kagahapon sa inisyal nga report gikan sa 78th Infantry Battalion diha sa site adunay 70 ka mga pasaherong sakay niini.

Base sa pasiunang nahipos nga mga pangalan sa nangamatay ni PO2 Cesar Climaco sa Balamban Police Station sila mao si Shah Mary Sharan, 31; Ataa Bargh Chi, 5, ug ang mga ginikanan niining sila si DV Bargchi ug ginang Bargchi (wala pa mailhi ang ngalan sa inahan); Pasha Masooma Badi, Pasha Johani, pulos mga minor, Alfa Barg Chi; Fojhan (wala makuha ang apelyido) estudyante sa Gullas College of Medicine; Dr. Ali Kamrani sa Cebu Doctors University (CDU) Nuclear Medicine; Pedram Farjam, estudyante sa Gullas College of Medicine; Hamed Reza Hozoori estudyante sa Gullas College of Medicine; Dr. Morteza Ghasem resident Pathologist sa CDU ug usa ka wala mailhing babaye.

`Kagahapon sa hapon, aduna pay kinse ka wala pa mailhing patay’ng lawas nga naugkat gikan sa pagkapiit sa ilawom sa maong bus nga giugkat sa mga sakop sa nagkadaiyang rescue organization lakip na sa mga kasundaluhan ug kapolisan.

Wala pa masuta kun ang nahaunang gipanghinganlang nangakalas naglakip na ba sa kinse ka patay’ng lawas nga naugkat diha sa site.

Sa report sa DyAB kagahapon, aduna nay napulo ka nangaangol nga nalandig sa CDH samtang aduna pay onse ka mga nangaangol ang gi-airlift sa mga chopper sa Philippine Air Force padulong sa dakbayan sa Sugbu.

Aduna pay kapin sa 25 ang naangol nga gidala sa Balamban District Hospital. Samtang atol ning pagsulat sa balita gikabalak-ang aduna pay duha nga napiit sa nagusbat nga unahang bahin sa bus.

Base usab sa impormasyong nahipos sa mga polis nga ang bus nga gisakyan sa mga biktima nagtangag sa plakang GWZ-666 ug gikabalak-ang apil sa nakalas ang drayber niini.   Si Salih Hossainkhani usa sa mga survivor sa maong hitabo kinsa nakaangkon lang og samad sa kamot mibutyag ngadto sa mga tigbalita nga kasagarang sakay sa bus mga Post Graduate Intern (PGI) sa college of medicine sa CDU ug Gullas College of Medicine (GCM) lakip sa uban kanila ang unom ka mga espesyalistang mga doktor. Sumala pang Hossainkhani nagkasabot silang mag-outing ug mangaligo sa usa sa mga beach resorts sa Balamban ug sayo silang migikan sa dakbayan sa Sugbu.

Dugang pang Hossainkhani aduna silay napanimahuang sunog sulod sa bus ug nagduda siyang naputlan sila og brake ug nalahos sila ngadto sa bung-aw. Ang konsehal sa Balamban nga si Dave Karamihan mibana-banang ang bung-aw dunay giladmon nga 30-40 ka metros.

Si Elmer Navaja, 26, kinsa residente diha sa lugar nga nahitaboan mibutyag sa Banat News nga nakita niya ang bus nga kusog ang dagan ug duna silay nadungog nga mipaka.

Nagtuo silang nagkambyo lang ang drayber ug naputlan og kontrol sa manobela hinungdan nga nalahos kini ngadto sa bung-aw, dali silang nanaog sa bung-aw ug gitabangan ang mga pasaherong buhi pa ug gisaka diha daplin sa karsada.

Gibutyag ni Navaja nga mga sobra sa 30 ang ilang naugkat nga mga pasahero nga buhi pa ug kadtong tan-aw nilang wala na maglihok wala na lang nila kini ugkata.

Ang bus nabangga sa usa ka dakong bato ug nabali kini diha sa ilawom ug naghayang na ug ang mga pasahero natapok ngadto sa atubangan han-ok sa drayber sumala pa ni Navaja.

Si Chief Inspector Resty Santos, hepe sa Balamban Police Station mibutyag sa Banat News nga pasado alas 10:30 na nila nadawat ang taho kinsa usa ka nagmotor nga nagkurog pa maoy mipahibawo ngadto kanila.

Ang hepe sa Police Regional Office (PRO)7 Lani-O Nerez uban sa hepe sa Cebu Police Provincial Office (CPPO) nga miadto sa lugar mibutyag sa mga tigbalita nga 70 ka mga pasaherong sakay sa nahisgutang mga bus.

Si Chief Supt. Lani-O Nerez, director sa Police Regional Office 7 ug tsirman sa Regional Disaster Coordinating Council mibutyag nga i-freeze lamang sa mga punerarya ang mga namatay gumikan kay gidili sa relihiyon sa Iran ang pag-embalsamar sa minatay. (Uban nila ni Mylen Manto, Lalaine Calatrava ug Claire Alagdon (BANAT NEWS)