20-anyos gi-shotgun sa gwardiya patay

CEBU, Philippines - Patay ang usa ka batan-ong lalaki gidudahang kawatan human gi-shotgun sa usa ka gwardiyang magbalantay sa poultry farm nga buot unta niining kawatan alas-3 pasado sa miaging kaadlawon sa barangay Tabok Kamalig Bato, dakbayan sa Danao.

Ang namatay mao si Alfie Cuizon, 20, nagpuyo sa maong dapit samtang ang nakapusil mao si Orlando Langia Montepalcon, 30, gwardiyang nadestino sa nahisgutang manukan.

Si PO3 Wendell Pilapil sa kapolisan sa maong dakbayan dihang nahinabi sa Banat News base sa pamahayag sa gwardiya kanila giingong nakamatikod siya og kasikas diha sa kural.

Tungod niini iyaha kining gisusi ug nakit-an si Cuizon diha mismo sa sulod sa maong poultry farm hinungdan nga iyaha kining gibadlong apan wala kini mopatuo hinungdan nga iyaha kining gipusil.

Human sa maong pagpamusil ang suspetsado mitahan usab diha sa ilang buhatan lakip na ang iyang shotgun nga gipanag-iya sa security agency niining gialagaran.

Dugang pa ni PO3 Pilapil nga ang suspetsado   kasamtangan karong ilang gibalhog sa bilanggoan ug tukmang lakang ang ilang pagahimoon batok niini. - BANAT NEWS