Estudyante mamalhin sa public school

CEBU, Philippines - Gipaabot ni Dr. Paulus Marie Cañete, ang Presidente sa Mandaue City College (MCC) nga daghang estudyante sa pribadong eskuylahan ang mamalhin sa tulunghaan sa gobyerno tungod kay wala kini mopaumento sa bayranan sa matrikula.

Nahisgutan ni Cañete nga karong tuiga daghang mga eskuylahang pribado dinhi sa Sugbo ang mipaumento sa bayranan sa matrikula busa nagping-it na ang kadaghanang mga ginikanan nga apiktado sa maong umento.

Matud pa ni Cañete nga sa mga tulunghaan nga gipadagan sa mga lokal nga kagamhanan, gimintenar niini ang tag P100 ra nga bayranan sa estudyante matag unit.

Gumikan sa tinguha sa mga opisyal sa lokal nga kagamhanan nga kahatagan og tukmang edukasyon ang ilang mga molupyo, dako kaayo ang tinguha niini nga makapatukod og kaugalingong kolehiyo sa ilang tagsa-tagsa ka lugar.

Kini tungod kay kasagaran sa anaa sa kahilitang mga barangay ug kalungsoran, mga kabus nga dili na makasarang sa paglampos sa ilang pagtuon didto sa mga dagkung syudad sama sa dakbayan sa Sugbo.

Matud pa ni Cañete nga dako na kaayo karon ang bintaha sa mga estudyante sa kabarangayan ug kalungsoran tungod kay ang mga opisyal sa lokal nga kagamhanan naningkamot usab aron makapatukod og eskuylahan ang ilang lugar alang sa tinguha nga modas-ag ang mga professional sa ilang dapit.

Dinhi sa Sugbo ang mga lokal nga kagamhanan nga nagbukas sa ilang kaugalingong kolehiyo mao ang dakbayan sa Mandaue, dakbayan sa Talisay, mga lungsod sa Consolacion, Cordova, Madredijos ug uban pa.  - BANAT NEWS