Ombudsman padayon sa pagsusi sa kontrobersiya sa Balili lot

Giklaro ni assistant Ombudsman Virginia Palanca Santiago nga ang gipahigayong pakisusi sa giingong kwestyonableng pagpalit sa Kapitolyo sa lote sa Balili sa barangay Tinaan, Naga City sa ilang buhatan anaa pa gihapon sa fact finding investigation.

Kini tungod kay hangtud karon nagpadayon pa gihapon silang nanguha og mga importanteng dokumento ug ebidensya alang sa ilang rekomendasyon.

Matud pa ni Santiago nga nakasumiter na unta og finding ang mga opisyal sa Department of Environment and Natural Resources labot sa ilang land survey ug sa titulo sa lote sa Kapitolyo apan matud pa gibawi kini kay gikinahanglan pa kining usbon.

Kini ang hinungdan nga iyang gipadali ang mga opisyales sa DENR sa paghuman niini aron makatapos na usab sila sa ilang fact finding investigation.

Matud pa ni Santiago nga sa higayon nga makakita sila og igong ebidensiya ilang ihandos ang pormal imbestigasyon alang sa tukmang kaso nga isang-at unya batok sa mga opisyales sa Kapitolyo ug sa tanang mga tawo nga nalambigit niini.

Matud pa ni Santiago nga mao usab kini ang hinungdan nga hangtud karon wala pa nila ipatawag si provincial board member Juan Bolo aron usab manubag.

Dugang pa niiini nga bisan og wala na unya sa gobiyerno si Bolo nunot sa pagkapildi niini sa nakalabay’ng eleksyon mahimo gihapon kini makapanubag sa maong kaso.(Chester Abadilla)